Môi tung mâu tíu ki hlo nhên tung tơdroăng pêi tiô Pơkâ 18 a Dak Lak cho mâu tơdroăng tơ’mot, tơkŭm mâu kơ koan, tíu pêi cheăng vâ pro iâ mơngế ki pêi cheăng ăm tơnêi têa vâ tơdroăng cheăng pêi tơƀrê. Pôa Trương Hoài Anh, Ngế pơkuâ ngăn mâu tơdroăng nếo ai ƀă hyôh rơ’jiu kong pơlê Dak Lak, ăm ‘nâi tơdroăng tơ’mot Khu pơkuâ ngăn mâu tơdroăng nếo ai ƀă hyôh rơ’jíu tơ’mot tơdjuôm ƀă Khu pơkuâ ngăn Khoa hok Kŏng ngê̆ hiăng tơbleăng tơdâng tơ’mô ƀă pêi tơƀrê. Tŭm péa hiăng tơkŭm po hên hneăng hôp vâ môi tuăn troăng hơlâ tơ’mot, mơjiâng tơdroăng Tơkêa bro tôh pêi cheăng hdrối hâi lơ 10/1/2025.

“Khu pơkuâ ngăn tơbleăng ăm tâi tâng mâu kăn ƀô̆ mâu kăn pơkuâ mâu kơ koan, mâu ngế pêi cheăng tung kơ koan ƀă mơngế ki ê veăng cheăng tung kơ koan. Ƀă tơdroăng tơ’mot 2 tíu pêi cheăng cho Khu pơkuâ ngăn mâu tơdroăng nếo ai ƀă hyôh rơ’jiu tơ’mot tơdjuôm ƀă Khu pơkuâ ngăn khoa hok Kŏng ngê̆ mê Vi ƀan kong pơlê hiăng mơjiâng môi tôh pêi cheăng hdrối hâi lơ 10/1/2025 ƀă kô hôp tôh vâ tơbleăng tơdroăng tơkêa bro hdrối hâi lơ 15/1 vâ tơbleăng ăm Vi ƀan kong pơlê ƀă khu kăn hnê ngăn cheăng Đảng kong pơlê tro tiô pơkâ”.

A tơring Čư̆ Mgar, pôa Trần Đình Nhuận, Kăn hnê ngăn cheăng Đảng tơring xuân ăm ‘nâi pêi pro tiô pơkâ 18, Čư̆ Mgar hiăng tơ’mot Tíu xiâm ngăn túa lĕm tro tơ’noăng ivá ƀă Rơ’jíu um tơvi, tơ’mot ƀă 8 to hngêi trung hriâm, kơdroh 8 to pơlê ƀă vâ tối hiăng kơdroh ai 10% kăn ƀô̆ mơngế pêi cheăng tung lâp tơring. Tung la ngiâ, tơring Čư̆ Mgar pơkâ thế hên troăng hơlâ tơ’mot ki ê, tơtro má môi mâu Tíu păn mơnăn, pêt loăng plâi khu rak ngăn hdrê loăng pơkeăng oâ hdrong chiâng môi tíu cheăng ‘na chiâk deăng cho dêi râ tơring... Mâu tơdroăng pơhlêh mê ôh tá xê to kơdroh xiâm mê ối gum mâu kơ koan, tíu pêi cheăng ai pơxúa tơƀrê tâ.

“Khu kăn hnê ngăn cheăng Đảng tơring hiăng trâm mâu ngế ki pêi cheăng ối pá xôp 5 hơnăm vâ ăm vâi tăng ‘nâi plĕng mâu tơdroăng ‘na pui vâ ƀă pêi mâu tơdroăng ‘na tuăn mơno vâ mơhnhôk ăm mâu kăn ƀô̆ ki mê pơtê hdrối kơ hơnăm la xuân châ kâ liăn tiô tơdroăng pơkâ, troh nôkố ai 1 ngế ki pơkuâ Ƀơrô ƀă 5 ngế phŏ, ƀă phŏ ƀơrô hiăng ai đơn pâ pơtê hdrối hơnăm pơkâ”.

Pôa Bạch Văn Mạnh, Ngế pơkuâ Khu ngăn mơngế pêi cheăng ăm tơnêi têa dêi kong pơlê, xuân tối, kơ’nâi 7 hơnăm pêi pro tiô pơkâ 18, kong pơlê Dak Lak hiăng kơdroh ai 10% mơngế pêi cheăng ton hơnăm ƀă hơnăm 2015, kơdroh 30 ƀơrô, khu ngăn mâu tíu pêi cheăng, ƀă kơdroh 40 ƀơrô ƀă mâu tíu pêi cheăng tơdâng dêi mâu khu pêi cheăng. Kố cho môi tung mâu tơdroăng tơxâng tơmâng xo, ôh tá xê to mơhno ki mơ-eăm tung kơdroh mơngế pêi cheăng mê ối tơniăn tơƀrê tung rak ngăn tung pơla tơdroăng cheăng pơkâ pêi rế kal ƀă mâu ngế pêi cheăng ăm tơnêi têa.

Tung la ngiâ, Dak Lak  pơtối pêi pro mâu troăng hơlâ tơkŭm, tơ’mot mâu tíu pêi cheăng, kơvâ cheăng, vâ kơdroh kơxô̆ mơngế cheăng ƀă mơdêk tơƀrê tung rak ngăn. Pôa Bạch Văn Mạch ai tối:

“Ngin hiăng tơdroăng rah chêh ƀă tơdroăng cheăng rah mâu ngế pêi cheăng tiô kơ droăng chêh hdró pro hdrối. Vi ƀan kuăn pơlê dêi kong pơlê  hiăng hnê mơhno ăm Khu ngăn mơngế pêi cheăng ăm tơnêi têa tơrŭm ƀă mâu kơvâ cheăng mơjiâng 8 tôh ‘mâi xing xoăng nếo mâu ngế pêi cheăng tung mê krếo Kăn hnê ngăn veăng cheăng a 2 tôh ƀă mâu ngế phŏ Kăn hnê ngăn Vi ƀan Kuăn pơlê veăng tung mâu tôh vâ môi tuăn. Hên tôh xuân hiăng hôp vâ môi tuăn. Tơdroăng pêi pro thâ tơbleăng, pêi rĕng”.

Khu kăn pơkuâ hnê ngăn cheăng Đảng kong pơlê Dak Lak hiăng mơnhên tơdroăng pơkâ 18 cho hnoăng cheăng pêi ki kal, ôh tá chiâng mơdon. Pôa Nguyễn Đình Trung, Kăn pơkuâ hnê ngăn Đảng kong pơlê, tối: Kố cho môi tơdroăng ‘mâi hơ’lêh kăch măng ‘na pro kơdroh rah iâ mơnế ki pêi cheăng, tăng rĕng pêi pro kơdroh rế pơxúa ăm tơdroăng mơnhông tơnêi têa”. Kong pơlê Dak Lak xúa pêi troăng hơlâ “hlối kơtâu hlối pơtăng”, tơmâng a tơdroăng tơbleăng tơdroăng cheăng pêi ƀă ki mơ-eăm khât, hlối pro tơniăn tơdrêng tơdâng tơ’mô, môi tuăn pơla mâu kăn, ing tíu xiâm tơnêi têa troh cheăm bêng:

“Pơ’lêh nếo, xing xoăng tơkŭm khu ngế pêi cheăng ăm tơnêi têa dêi khu cheăng kal kí rah iâ mơngế, pêi cheăng tơƀrê, ai pơxúa cho hnoăng cheăng pêi ki kal, cho tơdroăng pơ’lêh tơtro ‘na rah iâ mơngế pêi cheăng tung khu cheăng kal kí, tơdrêng ƀă hên tơdroăng xơpá, tơvâ tơvân, tơdroăng tá khoh ki tơdjâk troh hnoăng pơxúa, tuăn tơmiât púi vâ, tơdroăng tuăn pâ dêi kăn ƀô̆, mâu kăn pơkuâ, mâu ngế pêi cheăng tung kơ koan, mâu ngế pêi cheăng tung tâi tâng tơdroăng kal kí. Kal thế ai tơrŭm ƀă dêi rơpó, môi tuăn dêi rơpó tung mâu tơdroăng, vâ môi tuăn, mơ-eăm pêi klêi xua  tơdroăng ki pro pơxúa tơdjuôm dêi kong pơlê”.

Tơdroăng mơ-eăm dêi tâi tâng khu cheăng kal kí, ing kong pơlê troh tơring, ƀă tơdroăng hnê mơhno nhên khât dêi rêm râ kăn pơkuâ, Dak Lak dế mơ-eăm pêi pro tiô Pơkâ 18 ƀă tơdroăng “Pơ’lêh nếo, xing xoăng khu pêi cheăng dêi khu cheăng kal kí rah iâ mơngế, pêi cheăng tơƀrê, ai pơxúa”. Mâu tơdroăng hiăng pêi pro ăm hlo ki mơ-eăm, môi tuăn dêi rơpó, mơhé vâ xơpá, kong pơlê Dak Lak kô pơtối prôk tro troăng ƀă pro xiâm krá kak ăm tơdroăng mơnhông tung la ngiâ.