Pôa Phạm Minh Chính, Ngế pro xiâm hnê ngăn tơnêi têa khĕn kơdeăn khât ki kơdôu mơ-eăm dêi khu hnê pơtâp, ối ako cho thái hnê kơtú Kim Sang Sik ƀă tâi tâng mâu ngế kơtú ƀa long Việt Nam hiăng tơkâ luâ xơpá, pơloăng mơnúa vâ châ kâ ối má môi ASEAN Cup 2024, ai tiô tuăn púi vâ ƀă mơngế ki hâk vâ ngăn dêi mơngế Việt Nam, djâ a tơdroăng ki ro hâk tơngăm ăm Tơnêi têa.

Ngế pro xiâm hnê ngăn tơnêi têa tối, ki châ kâ mê ôh tá xê to tơdroăng hâk tơngăm to ‘na tơ’noăng ivá Việt Nam mê ối cho xiâm ki mơhno ăm tâi tâng hdroâng mơngế, mơhno ki púi vâ mơ-eăm mơnhông ƀă tơkâ luâ tơdroăng xơpá ki nếo.

A rôh trâm mâ, pôa Phạm Minh Chính, Ngế pro xiâm hnê ngăn tơnêi têa teăng mâ mâu kăn xiâm Đảng Tơnêi têa diâp Huân chương Lao động ối Má môi ăm khu Kơtú ƀa long vâi kơnốu dêi tơnêi têa. Diâp Huân chương Lao động ối má 3 ăm 6 ngế kơtú ƀa long kơnốu dêi tơnêi têa mê cho Duy Mạnh, Quang Hải, Tiến Linh, Ngọc Đức, Đình Triệu, Nguyễn Xuân Son.