Tiô tơbleăng, hơnăm 2024, kơvâ tơpui kâ hiăng châ hên tơdroăng tơƀrê ki kal má môi, gum rak krá tơniăn tơdroăng hơniâp lĕm, tơniăn ƀă tơrŭm ăm mơnhông; Pơtối pro krá tơniăn tâi tâng tơpui kâ ƀă kong têa ê tơ’lêi hlâu, djâ tơrŭm cheăng ƀă khu tơrŭm cheăng prôk trâu hơngế, păng ‘nâng, châ tơƀrê. Pôa Phạm Minh Chính, Ngế pro xiâm hnê ngăn tơnêi têa mơnhên, kheăn kơdeăn ƀă rơkâu Khu xiâm tơpui kâ ƀă kong têa ê ƀă mâu Kơ koan teăng mâ Việt Nam a kong têa ê hiăng tơrŭm krá tơniăn ƀă mâu khu xiâm, kơvâ cheăng, kong pơlê, khu tê mơdró pêi pro tơtro, teăm tơdrêng, châ tơƀrê mâu hnoăng cheăng tơpui kâ ƀă kong têa ê, veăng gum tung tơdroăng châ tơƀrê tơdjuôm dêi lâp tơnêi têa hơnăm 2024.

Ngế pro xiâm hnê ngăn tơnêi têa pơkâ thế tâi tâng kơvâ tơpui kâ ƀă kong têa ê pơtối thăm tơrŭm, pêi pro tơdâng tơ’mô, tơmiât pêi rơkê, châ tơƀrê mâu tơdroăng tơpui kâ ƀă kong têa ê dêi Đảng, tơpui kâ ƀă kong têa ê Tơnêi têa ƀă tơpui kâ ƀă kong têa ê Kuăn pơlê, tơpui kâ ƀă kong têa ê dêi mâu râ; mơjiâng tơdroăng tơpui kâ tiô rơxông nếo ƀă rơkê; mơjiâng Đảng krúa lĕm, krá tơniăn; mơdêk ivá pơkuâ ƀă ivá tơbriât dêi mâu khu tơrŭm cheăng Đảng, đảng viên tung kơvâ Tơpui kâ ƀă kong têa ê.