A cheăm Ea Tiêu, tơring Čư̆ Kuin, Khu xiâm ngăn Kŏng an tơrŭm ƀă Kŏng an kong pơlê ƀă Khu pơkuâ ngăn Đoân droh rơtăm tơkŭm po tơdroăng “Vêh ƀă pơlê cheăm”. Drêng kố, kăn pơkuâ Khu xiâm ngăn Kŏng an hiăng diâp 300 kơxuô tơmeăm pêt ăm mâu rơpŏng ki ai hnoăng, krâ pơlê, ngế pơkuâ thôn, ngế ki ai tơdroăng rêh ối pá puât; hơnăm ối nếo Kŏng an kuăn pơlê.

Đoân droh rơtăm Dak Lak diâp môi to kơbong kơmăi vi tĭnh, 100 hnoăng liăn hriâm rơkê nâl Ănglê ăm mâu vâi o hok tro râ má môi, tơbleăng pro mâu tơmeăm krâ pul on ăm bâ eăng a troăng pơlê, troăng hlá cơ Tơnêi têa; Khu pơkuâ ngăn Kăn sat Cơ đô̆ng hiăng pro klêi ƀă diâp 2 toăng hngêi tơrŭm. Tơdroăng “Vêh ƀă pơlê cheăm” dêi Khu xiâm ngăn Kŏng an cho vâ hnê hriâm khôi hmâ pâ nhuô̆m tơnêi têa, tơdjâk ki pơxúa tơniăn lĕm dêi tơdroăng pâ mơnê troh mâu ngế ai hnoăng, ngế ki ai hnoăng ƀă kăch măng, mơnhông hiâm mơno tơrŭm krá tung pơlê pơla mâu hdroâng kuăn ngo Việt Nam.

A cheăm tơkăng kong Ia Lốp, tơring Ea Súp, kong pơlê Dak Lak hiăng tơkŭm po tơdroăng ‘’Hơngui gâk tơkăng kong hơtô hiâm mơno kuăn pơlê tung pơlê’’, djâ troh ăm kuăn pơlê mâu hdroâng kuăn ngo tíu kố môi rơnó Hơngui hơtô ƀă pêng păm tơdroăng pói tơngah. A tơdroăng kố, vâ chê 400 kơxuô tơmeăm hiăng châ diâp troh mâu rơpŏng ai hnoăng tơnêi têa ƀă rơpŏng kơtiê, rơtế ƀă môi toăng hngêi ‘’Tơrŭm môi tuăn’’ kơnâ 100 rơtuh liăn. Ki rơhêng vâ tối, mâu hnoăng liăn hriâm rơkê xuân hiăng châ diâp ăm hok tro kơtiê hriâm rơkê, trâm mâ mâu vâi o mot tung la ngiâ.

Mâu lêng Mô đô̆i Gâk tơkăng kong rơtế ƀă kuăn pơlê kơxuô kơƀăn chưng tơdah Têt

Tơdroăng ‘’Hơngui gâk kring tơkăng kong hơtô hiâm mơno kuăn pơlê tung pơlê’’ ôh tá xê to kơxuô tơmeăm mê ối cho kơxái tơdjêp tuăn pâ khu lêng kuăn pơlê, thăm rak krá tơniăn tơdroăng tơrŭm pơla khu Mô đô̆i gâk tơkăng kong ƀă kuăn pơlê mâu hdroâng kuăn ngo, mơjiâng chiâng xiâm kối krá tơniăn ăm môi tơkăng kong hơniâp lĕm, hơtô.