Hơnăm 2024, ƀă hnoăng cheăng cho kơ koan ki tí tăng ‘nâi plĕng tơdrêng, gum cheăng ăm Kuô̆k hô̆i, Vi ƀan pơkuâ Kuô̆k hô̆i, Hô̆i đong Hdroâng kuăn ngo, mâu Vi ƀan dêi Kuô̆k hô̆i, mâu Khu ối tung Vi ƀan pơkuâ Kuô̆k hô̆i, Ƀơrô cheăng Kuô̆k hô̆i hiăng tơbleăng, pêi pro ƀă pro klêi hên tơdroăng pơkâ thế, hnoăng cheăng ki hngăm hngo, tung mê ai mâu tơdroăng ki pêi mơnhông tơƀrê, tơdroăng nếo, xơpá, ôh tá tơniăn.

Ƀơrô cheăng Kuô̆k hô̆i hiăng teăm tí tăng ‘nâi plĕng, gum tơkŭm po ƀlêi chiâng 6 hneăng hôp Kuô̆k hô̆i, tung mê ai 04 hneăng hôp ôh tá tối hdrối ƀă 02 hneăng hôp tiah hmâ; 33 rôh hôp dêi Vi ƀan pơkuâ Kuô̆k hô̆i; 7 Rôh hôp ki kal dêi Vi ƀan pơkuâ Kuô̆k hô̆i; rơtế ƀă hên tơdroăng cheăng ki ê dêi Kăn xiâm hnê ngăn Kuô̆k hô̆i, mâu kăn xiâm phŏ hnê ngăn Kuô̆k hô̆i.

Ƀă mâu ivá mơ-eăm hên, hơnăm 2024, Ƀơrô cheăng Kuô̆k hô̆i hiăng tơrŭm tăng ‘nâi plĕng, gum tơbleăng ăm Kuô̆k hô̆i tơbleăng 31 luât, 17 tơdroăng pơkâ, ăm rơkong tơpui ƀă 21 tơdroăng tơkêa luât ƀă hên ki ê veăng gum teăm tơdrêng vâ pơhlêh troăng hơlâ, troăng prôk dêi Đảng, pêi pro châ tơdroăng pơkâ thế ki ai khât ƀă tung tơdroăng rêh ối, veăng gum kal khât tung tơdroăng ki chêh pro klêi troăng hơlâ tŏng gum, troăng hơlâ luât, pêi pro mâu tơdroăng pơkâ luât dêi hneăng ƀă mơdêk mơnhông cheăng kâ rêh ối dêi tơnêi têa.

Tơpui hnê mơhno a Rôh hôp mơgêi tơdroăng cheăng hơnăm 2024, tơbleăng hnoăng cheăng pêi hơnăm 2025 dêi Ƀơrô cheăng Kuô̆k hô̆i, pôa Trần Thanh Mẫn, Kăn xiâm hnê ngăn Kuô̆k hô̆i tơmâng xo ƀă khĕn kơdeăn tơdroăng cheăng dêi Ƀơrô cheăng Kuô̆k hô̆i, mâu kơ koan, tíu pêi cheăng hiăng mơ-eăm, tŏng gum pêi klêi hên tơdroăng cheăng ƀă tơdroăng ki pêi pro tơƀrê tâ. Tối nhên hơnăm 2025 cho hơnăm ki po Hneăng hôp Đảng ƀô̆ rêm râ vâ pêi pro troh Hneăng hôp mâu kăn lâp tơnêi têa rôh má 14 dêi Đảng; hbrâ ăm rôh pôk kăn Kuô̆k hô̆i hneăng 16 ƀă kăn Hô̆i đong hnê ngăn rêm râ pơla hơnăm 2026 – 2031, xua mê, pôa Trần Thanh Mẫn, Kăn xiâm hnê ngăn Kuô̆k hô̆i pơkâ thế Ƀơrô cheăng Kuô̆k hô̆i, Đảng ủy kơ koan ƀă Kong đoàn pơtối mơdêk hiâm mơno pôu râng, tơrŭm, tơmiât rơkê vâ pêi pro klêi hnoăng cheăng châ pơcháu.

“Ki hdrối tâ cho athế pơtối pơhlêh nếo túa pêi cheăng, “mơdêk râ” kơ koan cheăng dêi Kuô̆k hô̆i, rĕng pêi pro mâu tơdroăng cheăng ki châ xing xoăng pro ‘nâng ‘nâi pêi cheăng xêt tơƀrê mâu Vi ƀan dêi Kuô̆k hô̆i, mâu kơ koan Vi ƀan pơkuâ Kuô̆k hô̆i, mâu khu pơkuâ, mâu tíu pêi cheăng ối tung Ƀơrô cheăng Kuô̆k hô̆i tiô pơkâ thế dêi Tơnêi têa”.

Pôa Trần Thanh Mẫn, Kăn xiâm hnê ngăn Kuô̆k hô̆i xuân pơkâ thế kal séa ngăn, pâ thế ‘mâi rơnêu, ‘mot tơ’nôm mâu luât, tơdroăng pơkâ ki ai tơdjâk troh klâ xoăng, tơkŭm môi tíu, pêi cheăng xêt tơƀrê kơ koan cheăng, ‘mâi rơnêu ‘mot tơ’nôm tơdroăng pơkâ Hneăng hôp, Túa pơkâ pêi cheăng dêi Vi ƀan pơkuâ cheăng Kuô̆k hô̆i. Tơdrêng amê hlối pơtối pơhlêh nếo, pơtối mơdêk ki rơkê plĕng, tí tăng ‘nâi plĕng, pêi pro tro mâu Hneăng hôp; Kăn ƀô̆, đảng viên, ngế pêi cheăng kal rak kơtăng tơdroăng pơxâu, pro mơhrê liăn ngân, kâ kơhveăm.

Tối nhên, Khu xiâm pơkuâ tơdroăng kal kí Pơkâ kơxô̆ 57 ‘na mơnhông tơƀrê mơjiâng khoa hok, kong ngê̆ kal athế mơdêk rơdêi xúa kong ngê̆ thong tin ƀă pơhlêh kơxô̆ tung pêi cheăng dêi Ƀơrô cheăng Kuô̆k hô̆i, tro pơhlêh túa chêh pro hlá mơ-éa, rak vế tơniăn tơ’lêi hlâu, mơdêk tơdroăng tơdjêp, tơbleăng tối mâu tơdroăng kal, hlá mơ-éa ki kal  teăm tơdrêng, tơƀrê .

Kăn xiâm hnê ngăn Kuô̆k hô̆i, ƀă ivá mơ-eăm pleăng ôh tá la lâi pơtê dêi mâu kăn ƀô̆, viên chưk mâu kơ koan dêi Kuô̆k hô̆i, malối tung pơla nôkố drêng tá khu pơkuâ tơdroăng cheăng kal kí dế pêi pro Pơkâ 18,  pâ thế rêm ngế kăn ƀô̆, đảng viên, Đảng ủy, kong đoân athế krá, loi khât tung tơdroăng pơkuâ dêi Đảng vâ pêi pro ƀlêi chiâng mâu tơdroăng pơkâ mơ’no.

Kăn xiâm hnê ngăn Kuô̆k hô̆i xuân pơkâ thế, kăn ƀô̆, viên chưk tơbleăng kơtăng Pơkâ dêi Khu pơkuâ ngăn Đảng ‘na tơdroăng tơkŭm po Têt Ất Tỵ hơnăm 2025, tơniăn pơxúa, krâu, tro pơkâ ƀă pơkâ tơleăng mâu tơdroăng dế ai, malối cho tung rôh Têt Lo hơnăm nếo; pơkâ thế Ƀơrô cheăng Kuô̆k hô̆i tơmâng ngăn, tŏng gum Têt ăm kăn ƀô̆, kong chưk, viên chưk kơ koan ai môi rôh Têt phâi phâi hơtô, ro, tơniăn, kơdĭng.