Tung tơdroăng hbrâ tơdah hơnăm nếo 2025 ƀă tơmiât pêi troh leh tơbâ 95 hơnăm mơjiâng Đảng Kŏng san Việt Nam, hâi lơ 29/12, pôa Tô Lâm, Kăn xiâm pơkuâ hnê ngăn Đảng rơtế Khu râ kăn xiâm Tơnêi têa hiăng  pleăng rơvĭu reăng, têk nhang tơbâ Pôa Hồ Chí Minh, Kăn xiâm hnê ngăn tơnêi têa hneăng apoăng a Tíu koh tơbâ Chung Sơn – Tíu koh tơbâ jâ pôa nôu pâ Pôa Hồ ƀă a kơpong tíu tơbâ tơmeăm roh nah tơnêi têa ki má môi Kim Liên, tơring Nam Đàn, kong pơlê Nghệ An.

Pôa Tô Lâm, Kăn xiâm pơkuâ hnê ngăn Đảng mơhno hiâm mơno pâ mơnê ôh tá kâi tối ƀă nhuô̆m trâu hơngế ƀă Pôa Hồ Chí Minh, Kăn xiâm pơkuâ hnê ngăn tơnêi têa hneăng apoăng, kăn pơkuâ ki kân dêi Đảng ƀă kuăn pơlê, ngế khên tơnôu tơleăng lĕm hdroâng mơngế.

Pakĭng pleăng hnoăng cheăng, mơheăm chá plâ rơxông ăm tơdroăng tơleăng lĕm hdroâng mơngế, tơplâ vâ châ tơniăn lĕm, hơniâp lĕm dêi hdroâng mơngế Việt Nam ƀă kuăn pơlê lâp plâi tơnêi. Pơtối mê, pôa Tô Lâm, Kăn xiâm pơkuâ hnê ngăn Đảng hiăng troh Tíu koh tơbâ jâ pôa, nôu pâ Pôa Hồ Chí Minh, Kăn xiâm hnê ngăn tơnêi têa hneăng apoăng, nhuô̆m pâ pleăng rơvĭu reăng, têk nhang, tơbâ mơhno hiêm mơno pâ mơnê trâu hơhngế ƀă Pôa Hồ Chí Minh, Kăn xiâm hnê ngăn tơnêi têa hneăng apoăng ƀă mâu ngế nhŏng o tung rơpŏng dêi Pôa Hồ.