Tơpui pơkâ hiâm mơno pơhlêh nếo tung pơla mơjiâng pro luât tro ƀă tơdroăng ki pêi pro luât, pôa Trần Thanh Mẫn, Kăn xiâm hnê ngăn Kuô̆k hô̆i mơnhên tối khât mâu kơ koan dêi Chin phuh, dêi Kuô̆k hô̆i ƀă mâu kơ koan ki ai tơdjâk hiăng rĕng hbrâ, gum Chin phuh tơrŭm ƀă Vi ƀan pơkuâ Kuô̆k hô̆i teăm tơkŭm po Rôh hôp pơkâ, tơbleăng pêi pro mâu luât, tơdroăng pơkâ châ Kuô̆k hô̆i tơbleăng a Hneăng hôp má 8, Kuô̆k hô̆i hneăng 15, vâ rĕng mơ’no mâu luât, tơdroăng pơkâ châ Kuô̆k hô̆i tơbleăng xúa tung rêh ối. Pôa Trần Thanh Mẫn, Kăn xiâm hnê ngăn Kuô̆k hô̆i tối nhên:

“Vi ƀan pơkuâ Kuô̆k hô̆i mơnhên tối khât Ngế pro xiâm hnê ngăn Chin phuh hiăng rĕng ai Pơkâ inâi ƀă xoăng kơ koan chêh pro mơ-éa pơkâ nhên ƀă tâi tâng mâu luât, tơdroăng pơkâ ki châ Kuô̆k hô̆i tơbleăng a Hneăng hôp má 8. Xua kơxô̆ tơdroăng cheăng ki kal, hlá mơ-éa pơkâ nhên kal châ pơkâ chía hên, krê ƀă 18 luât, Chin phuh, mâu Khu xiâm kal pơkâ 127 mơ-éa, mâu tơdroăng luât, tơdroăng pơkâ châ xêt khât pêi pro ing apoăng hơnăm 2025, pơkâ thế rêm khu xiâm, kơvâ cheăng châ pơcháu pơkuâ chêh pro kal pêi pro tro tung tơdroăng pơkâ thế a Pơkâ dêi Ngế pro xiâm hnê ngăn Chin phuh, tơkŭm hnê mơhno vâ pro, pơtroh ăm mơ-éa tro hâi khế, rak tơniăn tro rơkê”.

Hneăng hôp má 8, Kuô̆k hô̆i hneăng 15 hiăng tơbleăng hên mâu tơdroăng luât, tơdroăng pơkâ mê ai 18 luât, 4 tơdroăng pơkâ ‘na luât ƀă 17 tơdroăng pơkâ pơkuâ cheăng kâ, rêh ối ƀă tơdroăng ki môi tuăn hên má môi dêi mâu kăn Kuô̆k hô̆i. Tung mê, hên luât, tơdroăng pơkâ ki tơdjâk troh mâu kơvâ cheăng ki kal dêi rêh ối pơlê pơla, môi tiah ‘No liăn pêi cheăng; liăn ngân, nâp hnoăng liăn mơhá; tơdroăng rêh ối pơlê pơla; tơdroăng cheăng lêng, gâk kring. Tiô pôa Phạm Minh Chính, Ngế pro xiâm hnê ngăn tơnêi têa, tơdroăng mê hiăng mơhno ivá khŏm mơ-eăm khât, mơ-eăm hên, pêi pro kơtăng, rơkê dêi Kuô̆k hô̆i, Chin phuh, mâu kơ koan, khu tơrŭm ki ai tơdjâk tung tơdroăng cheăng mơjiâng, chêh pro klêi troăng tŏng gum, tơdroăng ki veăng dêi kuăn pơlê, khu mơdrtó kâ pơtối tối rơdêi ki tơrŭm cheăng rế hía rế tơƀrê, krá tơniăn pơla Kuô̆k hô̆i, Chin phuh.

"Ki khât ăm hlo pơla hdrối kố nah mâu troăng hơlâ tŏng gum hiăng rế hía rế châ xúa tung tơdroăng rêh ối ƀă mơnhông tơƀrê đi đo cho môi tơdroăng ki pơloăng mơnúa kân. Klêi kơ’nâi hneăng hôp mơgêi ngin hiăng pơkâ hlối túa ƀă pơla hdrối kố nah hiăng pơkâ hnê mơhno vâ hbrâ rơnáu ăm hneăng hôp hiăng vâ troh la ngiâ. La ngiâ ah, kô ai hên hĭn mâu tơdroăng cheăng athế pơtroh ăm Kuô̆k hô̆i ngin hiăng hbrâ rơnáu klêi, pơtih: Luât mơjiâng Chin phuh, Luât Khu tơrŭm kăn pơkuâ kong pơlê, Luât Pơkâ mâu hlá mơ-éa tro luât pơkâ, mê cho mâu luât ki kal vâ pin tơbleăng xúa tung tơdroăng cheăng tung la ngiâ ah”.

Pôa Phạm Minh Chính, Ngế pro xiâm hnê ngăn tơnêi têa ăm ‘nâi, hên tơdroăng cheăng kal pêi tung la ngiâ, Chin phuh, Ngế pro xiâm hnê ngăn Chin phuh, mâu kơ koan ai hnoăng cheăng pơkâ 130 hlá mơ-éa ƀă 569 tơdroăng kal pơkâ nhên. Tơdroăng tơbleăng mâu luât, tơdroăng pơkâ châ Kuô̆k hô̆i tơbleăng a Hneăng hôp má 8 pâ thế tơdroăng tơkŭm, mơ-eăm hên dêi mâu khu râ, kơvâ cheăng, kong pơlê.

‘Na mơdêk tơƀrê tơdroăng cheăng tơrŭm tung khu tơrŭm tơbleăng pêi pro luât, Ngế pro xiâm hnê ngăn tơnêi têa pơkâ thế: Mâu kơ koan dêi Kuô̆k hô̆i, mâu kăn Kuô̆k hô̆i pơtối tơrŭm krá tơniăn ƀă Chin phuh, khu xiâm kơvâ cheăng ing hneăng ki apoăng tung tơdroăng cheăng mơjiâng pro luât, rak vế tơdrăng rơkê dêi mâu tơdroăng pơkâ tung mâu tơdroăng tơkêa luât, tơdroăng pơkâ, pro tơ’lêi hlâu ăm tơdroăng ki pêi pro klêi kơ’nâi châ tơbleăng. Pôa Phạm Minh Chính, Ngế pro xiâm hnê ngăn tơnêi têa tối nhên:

“Đảng hiăng hnê mơhno, Chin phuh hiăng môi tuăn, Kuô̆k hô̆i vâ rơtế vâ, kuăn pơlê hiăng vâ, Tơnêi têa tơkôm, pin athế rơtế ƀă dêi rơpó rĕng ăm mâu luât, mâu tơdroăng pơkâ châ xúa tung rêh ối, pêi pro châ mâu tơdroăng ki loi tơngah dêi kuăn pơlê veăng gum mơjiâng pro môi Tơnêi têa hnoăng pơkuâ xah hô̆i chuh ngiah krá rơdêi, ăm tơnêi têa krá rơdêi mot tung Chal ki nếo – Chal ki mơnhông kro mơdrŏng rơdêi, rơkê dêi hdroâng mơngế pin”.