Tơpui hnê mơhno a rôh pêi cheăng, pôa Trần Thanh Mẫn, Kăn xiâm hnê ngăn Kuô̆k hô̆i ăm ‘nâi, hơnăm 2024, maluâ tơnêi têa pin ối trâm hên xơpá, laga tâk GDP xuân ối châ dâng 7%, tâi tâng 15 tơdroăng pơkâ xua Kuô̆k hô̆i mơ’no, tơdroăng rêh ối cheăng kâ châ rak vế tơniăn. Chin phuh, Măt trâ̆n Tơnêi têa Việt Nam dế kơhnâ pêi pro tơdroăng ‘nhiê tah hngêi tơ’nhiê xi kơchoh; tơdroăng cheăng lêng, gâk kring châ rak tơniăn; hnoăng cheăng tơpui kâ châ thăm mơdêk; hnoăng cheăng hbrâ mơdât kâ kơluâ, pro mơhrê liăn ngân châ mơdât rơdêi; hiâm mơno kuăn pơlê loi a Đảng, tơnêi têa châ mơdêk.

Kăn xiâm hnê ngăn Kuô̆k hô̆i tối nhên, châ tơdroăng kố cho ivá mơ-eăm kân dêi tâi tâng Đảng, tâi tâng khu lêng, tâi tâng kuăn pơlê, tung mê, ai ivá veăng gum hên dêi Kuô̆k hô̆i tung tơdroăng mơjiâng luât, pơkâ mâu tơdroăng ki kal dêi tơnêi têa tiô túa pơhlêh nếo tuăn tơmiât ƀă túa ki mơjiâng pro luât. Teăng mâ Vi ƀan pơkuâ Kuô̆k hô̆i, pôa Trần Thanh Mẫn, Kăn xiâm hnê ngăn Kuô̆k hô̆i khĕn kơdeăn mâu ivá veăng gum dêi mâu Vi ƀan, mâu tíu pêi cheăng tung Ƀơrô cheăng Kuô̆k hô̆i. Tối nhên, tung hơnăm 2025 ai hên tơdroăng ki kal dêi tơnêi têa, Kăn xiâm hnê ngăn Kuô̆k hô̆i pơkâ thế mâu kơ koan dêi Kuô̆k hô̆i, Ƀơrô cheăng Kuô̆k hô̆i, mâu kơ koan ối tung Vi ƀan pơkuâ Kuô̆k hô̆i ôh tá hâk vâ ƀă tơdroăng pêi pro châ kố mê kal athế mơ-eăm hên tâ nếo vâ ‘mâi mơnhông mâu tơdroăng ki tá hâi tơƀrê, mâu tơdroăng pêi ối ‘ro.

“La ngiâ kố ah, pin athế pro tiah lâi châ ‘mâi mơnhông a hneăng hôp má 9, hneăng hôp má 10 la ki hdrối tâ cho hneăng hôp ôh tá tối hdrối a khế 2/2025 cho tơdroăng ki rơkê plĕng dêi mâu hlá mơ-éa, mâu mơ-éa pơtroh, rơkê plĕng ‘na tơdroăng séa ngăn. Má péa, cho pơtroh mơ-éa ki kal ăm Khu kăn Kuô̆k hô̆i pro tiah lâi ăm teăm. Má pái cho ki rơkê plĕng ‘na tí tăng ‘nâi plĕng dêi Hô̆i đong hdroâng kuăn ngo, mâu Vi ƀan mâu tíu pêi cheăng, Ƀơrô cheăng Kuô̆k hô̆i athế pêi tro tâ. Má pŭn, cho tơdroăng pơxâu hôu tung kơ koan dêi pin mê gá athế pêi pro kơtăng tâ. Pro tiah lâi vâ tíu cheăng, tơdroăng loi dêi Kuô̆k hô̆i athế châ mơdêk tung pơlê pơla, a kuăn pơlê. Ki kal cho pin athế tơmiât tung tơdroăng cheăng pơkâ tơleăng mâu tơdroăng cheăng”.

Malối tơdroăng ki pêi pro Pơkâ 18 dêi Tơnêi têa ‘na xing xoăng kơ koan cheăng kal athế châ pêi pro kơtăng. Drêng kố, Kăn xiâm hnê ngăn Kuô̆k hô̆i púi vâ, mâu kăn ƀô̆, kong chưk, viên chưk, ngế pêi cheăng tơdjuôm ivá, môi hiâm mno, tơrŭm vâ tơkâ luâ xơpá. Kăn xiâm hnê ngăn Kuô̆k hô̆i pơkâ thế, mâu kơ koan dêi Kuô̆k hô̆i pơtối pơhlêh nếo túa pro luât, mơdêk hnoăng cheăng séa ngăn; xing xoăng, klâ hnoăng pơkuâ vâ pơkâ tơleăng tơdroăng cheăng tíu cheăng, tơdroăng cheăng, ngế cheăng; tơdrêng amê hlối séa ngăn ƀă pơhlêh pro hlá mơ-éa tung Kuô̆k hô̆i.

Kăn xiâm hnê ngăn Kuô̆k hô̆i xuân pơchân, tung la ngiâ ah, mâu tíu pêi cheăng dêi Ƀơrô cheăng Kuô̆k hô̆i kal hbrâ tro mâu hnoăng cheăng môi tiah: tơdroăng cheăng mơgêi dêi Kuô̆k hô̆i; rah xo 10 tơdroăng cheăng ki kal tung hơnăm 2024; tơdroăng tŏng gum Têt ăm kăn ƀô̆ kong chưk, rơpŏng hngêi ki xơpá. Malối, Vi ƀan pơkuâ Kuô̆k hô̆i tơkŭm po mâu rôh hôp 41, 42 tung khế 1, khế 2/2025 ƀă hneăng hôp ôh tá tối hdrối tung khế 2/2025; hbrâ ăm hneăng hôp má 9, Kuô̆k hô̆i hneăng 15; Tơkŭm po ƀlêi chiâng Rôh hôp Kuô̆k hô̆i ‘na tơdroăng cheăng séa ngăn ƀă Leh diâp pri Diên Hồng rôh má pái, rak tơniăn tơƀrê, krâu, pro ivá mơnhông tơdjâk.

Hdrối mê, tiô Ngế xiâm chêh tôm xo rơkong Kuô̆k hô̆i, Kăn pơkuâ Ƀơrô cheăng Lê Quang Tùng, tơdroăng ki tơbleăng mơgêi Pơkâ 18 dêi Khu pơkuâ Tơnêi têa hneăng 12 a khô̆i Kuô̆k hô̆i, klêi kơ’nâi ai troăng pơkâ, Đảng đoân Kuô̆k hô̆i hiăng pơkuâ, hnê mơhno Vi ƀan pơkuâ Kuô̆k hô̆i pro Ngế xiâm Khu hnê mơhno, mâu kăn phŏ hnê ngăn Kuô̆k hô̆i cho Phŏ kăn pơkuâ Khu hnê mơhno. Kăn xiâm hnê ngăn Kuô̆k hô̆i hiăng pơkâ kơtăng ‘na pơhlêh nếo, xoăng tơkŭm, iâ kơ koan cheăng mơdêk xêt tơƀrê dêi mâu kơ koan cheăng dêi Kuô̆k hô̆i, mâu kơ koan ối tung Vi ƀan pơkuâ Kuô̆k hô̆i, Ƀơrô cheăng Kuô̆k hô̆i; ai ƀai pơchuât ki kal a Rôh hôp lâp tơnêi têa pơkâ, tơbleăng mơgêi tơdroăng pêi pro Pơkâ 18 ‘na “troăng hơlâ tŏng gum mâu tơdroăng pá puât ‘na troăng pơkâ pêi”.