A roh trâm mâ, mâu kăn teăng mâ hiăng rơtế ngăn mâu phim tai liê̆u ‘na troăng prôk 80 hơnăm mơjiâng, tơplâ, xông kân dêi Khu lêng kuăn pơlê Việt Nam ƀă khu lêng kong pơlê Dak Lak xuân môi tiah Kuân khu V. Jâ H’Yim K’Đoh, Kăn phŏ hnê ngăn Vi ƀan kong pơlê Dak Lak pơtroh rơkong rơkâu ivá, mơhno hiâm mơno pâ mơnê trâu hơngế mâu tơdroăng veăng kum kân kĭn dêi mâu khu pú tung tơdroăng tơplâ, mơjiâng ƀă gâk kring Tơnêi têa.

Kăn phŏ hnê ngăn Vi ƀan kong pơlê Dak Lak tối tơbleăng ‘na tơdroăng mơnhông cheăng kâ – rêh ối pơlê pơla dêi kong pơlê Dak Lak hơnăm 2024. Jâ H’Yim K’Đoh pói vâ mâu khu kăn ƀô̆ khu lêng râ kăn xiâm hiăng pơtê cheăng xua hơnăm hiăng krâ, pơtê tơdroăng cheăng pơtối veăng kum tuăn ngôa rơkê, troăng tơmiât pêi rơkê, hnê ăm dêi pó tơ’nôm túa ki rơkê tơtro vâ mơjiâng krá tơniăn tơdroăng gâk kring tơnêi têa tâi tâng kuăn pơlê, tơdroăng gâk kring tơniăn kuăn pơlê ƀă khu lêng kong pơlê rế hía rế krá rơdêi.