Pôa Lê Thành Long, Ngế pro xiâm phŏ hnê ngăn tơnêi têa, Kăn hnê ngăn Hô̆i đong xing xoăng pơkuâ Kơpong tơbăng Kroăng Cửu Long pơkuâ po rôh hôp. Tiô tối tơbleăng dêi Khu xiâm pơkâ ƀă ‘No liăn cheăng, hơnăm 2024, tơdroăng mơnhông cheăng kâ rêh ối pơlê pơla dêi Kơpong tơbăng kroăng Cửu Long pêi châ tơƀrê hên tơdroăng.

Ki têi ‘na mơdêk cheăng kâ dêi Kơpong châ 7,31%, hên tâ kơlo tâk dêi lâp tơnêi (dâng 7%). Hên tơdroăng tơkêa pêi, kế tơmeăm pro ki kal tung kơpong châ tơbleăng, mơjiâng pro, pro tơ’lêi hlâu ăm tơdjêp tung kơpong. Laga, cheăng kâ tung lâp kơpong ối hên xơpá, pơkâ cheăng kâ kơpong ối iâ; 13/13 to kong pơlê tung Kơpong tá hâi tơdâng nâp hrê liăn tơnêi têa, túa mơdêk tá hâi krá. Tơdroăng ki têa xăng po lân mot hlo tâk rĕng, chiâng tơdjâk troh tơdroăng ki ôh tá ai têa vâ xúa tung ôu kâ hum roh.

Tơpui mơgêi rôh hôp, pôa Lê Thành Long, Ngế pro xiâm phŏ hnê ngăn tơnêi têa pơkâ thế mâu kong pơlê kal mơ-eăm pêi pro hnoăng cheăng xing xoăng pơkuâ kơpong, tŏng gum mâu tơdroăng ki pá dế trâm. Ƀă mâu tơdroăng tơkêa xiâm dêi Kơpong tung la ngiâ, kal kơjo gum xing xoăng liăn ăm mâu tơdroăng tơkêa ki kal tơnêi têa, tơdroăng pro hngêi trăng troăng klông ki kal veăng gum mơdêk cheăng kâ rêh ối rĕng, krá tơniăn.