Kơxo hâi lơ 1 Têt Yương lĭch 2025, roh tơƀai kơneăng dêi tơƀai Vietnam Airlines krâ kơxô̆ VN1603 troăng kơneăng Hà Nội – Ƀuôn Ma Thuột hdrâp a tơraih tơƀai Ƀuôn Ma Thuột, kong pơlê Dak Lak pơto 120 ngế tơmối ƀă nhân viên pêi cheăng tung tơƀai. Kố cho mâu tơmối má môi rơtuh pơtăm hrĭng rơpâu ƀă cho khu tơmối apoăng “chu a tơnêi” kong pơlê Dak Lak tung hơnăm 2025 tiô troăng tơƀai.

A kơpong tơkôm to tơƀai troh tơraih tơƀai Ƀuôn Ma Thuột, leh tơdah tơmối ôm hyô roh má “môi rơtuh pơtăm hrĭng rơpâu ngế” ƀă khu tơmối ôm hyô apoăng troh Dak Lak klăng roh Têt yương lĭch 2025 tơkŭm po kân krip ƀă tơdroăng mơđah tơbleăng tôu chêng koăng ƀă rơhdruê xuăng ki má môi. Teăng mâ kơvâ ôm hyô Dak Lak ƀă pơkuâ tơraih tơƀai Ƀuôn Ma Thuột diâp reăng ƀă kơxuô tơmeăm koh tơdah mâu tơmối ôm hyô apoăng troh ƀă kong pơlê tung hâi apoăng hơnăm nếo.

Mơhúa cho tơmối má môi rơtuh pơtăm hrĭng rơpâu troh Dak Lak, nâ Lưu Minh Lan, ối a pơlê kân Long Biên, Hà Nội tối rơrêk tung hiâm mơno ƀă phiu ro ƀă tơdroăng ki tơdah kân krip, tá hiâm mơno dêi kong pơlê tung hâi apoăng hơnăm nếo.

‘’Apoăng rơnó hơngui hơnăm nếo mê hơnăm kố tá rơpŏng rơtế prôk, mâu muăn xuân lăm pơtê xua mê hngêi á ai môi măng tĭng ối a kố, rế tê mơdró rế lăm ngăn kuăn kiâ kong, lăm ngăn mâu tíu ki lĕm a kố. Á xuân hiăng prôk a mâu tíu ki lĕm, roh kố á prôk a xí têa Gia Long klêi mê lăm long têa Lăk’’.

Leh tơdah tơmối ôm hyô roh má ‘’môi rơtuh pơtăm hrĭng rơpâu’’ ƀă tơmối ôm hyô apoăng troh Dak Lak klăng roh Têt yương lĭch 2025 cho tơdroăng vâ pro ki rơdêi tung hâi apoăng hơnăm nếo vâ mơdêk um, inâi ôm hyô Dak Lak, mơhnhôk tơdroăng ki tơtrŏng dêi kuăn pơlê, ki rơhêng vâ tối cho mâu tơmối ai liăn pêi kâ tung tơnêi têa ƀă kong têa ê. Tơdrêng amê, kố xuân cho roh vâ tơbleăng mâu tíu ôm hyô ki má môi ƀă ai liăn mơnhông ôm dêi kong pơlê, gum hên mơjiâng ƀă mơnhông inâi ôm hyô Dak Lak. Jâ Nguyễn Thụy Phương Hiếu, Kăn phŏ pơkuâ ‘na khôi túa lĕm tro, Tơ’noăng ivá ƀă Ôm hyô Dak Lak tối ăm ‘nâi:

‘’Khu xuân pói vâ mâu tơmối ki to tơƀai hdrâp chu troh Dak Lak kô tâ kuăn pơlê Dak Lak rơkê, lĕm, hâk vâ tơmối. Thăm nếo, mâu tơmối kô kô châ pơtâng tối, tơbleăng ‘na um méa, kuăn mơngế Dak Lak troh ƀă mơngế nhŏng o, pú hmâ ƀă kơ’nâi mê xuân cho vâi kô cho ngế hnê mơhno tơbleăng ‘na Dak Lak ƀă mâu tơdroăng ki tơbâ, veăng gum tơtêk ôm hyô troh ƀă Dak Lak’’.

Hơnăm 2024, tâi tâng pêi lo liăn ing ôm hyô a Dak Lak tâk lối 21% tâng pơchông ƀă hơnăm hdrối. Kố cho tơdroăng ki tro ƀă Dak Lak tung tơdroăng mơ-eăm mơnhông mâu tơmeăm nếo, tơtrŏng xúa mâu ki má môi krê tung khôi túa lĕm kơpong kân rơdâ. Hơnăm 2024, tâi tâng kơxô̆ liăn ing ôm hyô lâp kong pơlê Dak Lak châ 1.255 rơtal liăn, tâk lối 21% tâng pơchông ƀă hơnăm 2023, Dak Lak hiăng tơdah 1,5 rơtuh roh tơmối. Kơxô̆ tơmối lâp plâi tơnêi troh Dak Lak xuân tâk lối 34% tâng pơchông ƀă hơnăm hdrối.

Ki má môi tung kơvâ ôm hyô dêi kong pơlê hơnăm hiăng hluâ cho tơrŭm ƀă mâu tơdroăng koh phiu ro leh tơbâ 120 hơnăm mơjiâng kong pơlê Dak Lak. Kong pơlê hiăng tơkŭm po tơ’nôm hên tíu troh ôm hyô pơlê pơla a mâu tơring, mơnhông ki rơdêi dêi rêm hdroâng kuăn ngo vâ mơjiâng tơdroăng ki tơbâ krê. Tung mê, Troăng pêi tơdjêp tơmeăm kơnía ‘’chêng koăng Tây Nguyên tung troăng prôk ôm hyô tơmeăm roh ton nah Ƀuôn Ma Thuột – Dăk Lak’’ kô po rơdâ tung la ngiâ.

Pôa Lại Đức Đại, Kăn phŏ ngăn ‘na Khôi túa lĕm tro, Tơ’noăng ivá ƀă Ôm hyô Dak Lak tối ăm ‘nâi, troăng pêi kô kum kuăn pơlê hlê plĕng nhên ‘na ki kơnâ tơmeăm roh ton nah ki pin dế pơkuâ, tơ’nôm tơdroăng hâk tơngăm ƀă pơtối diâp hnoăng khôi túa lĕm chêng koăng Tây Nguyên; Pro tơ’lêi hlâu vâ tơmeăm roh nah khôi túa lĕm chêng koăng chiâng tơdroăng ôm hyô, tơdjêp pơlê pơla ƀă mơjiâng troăng prôk ôm hyô tơmeăm roh ton nah.

‘’Kô ai tơdroăng ki tơrŭm krá tơniăn tâ, ôh tá xê pêi pro 1 – 2 troăng pêi mê ối kô chiâng pêi pro hên troăng pêi rơtế môi xôh, mâu rơxông kô chiâng pơtối dêi pó rơtế tơdroăng ki veăng dêi mâu ngế rơkê, mâu ngê̆ nhân. Tơdroăng kĭ ing mâu kong pơlê hbrâ xuân môi tiah tơdroăng pơkâ pêi sap ing apoăng dêi Khu pơkuâ mơni kô ai tơdroăng ki pơtó ƀă hên rơxông pêi cheăng châ tơƀrê hôm ƀă rơkê tâ mê nếo’’.