Tiô tối tơbleăng, hơnăm 2024, maluâ trâm hên xơpá, la kong pơlê Dak Nông xuân ối châ pêi tơƀrê mâu tơdroăng mơnhông ahdrối kơpong Tây Nguyên, ƀă kơxô̆ liăn cho 90% tung tâi tâng 3.500 rơtal liăn pơkâ. Kơdroh kơtiê dêi kong pơlê pơtối ối rak a top ahdrối lâp tơnêi têa, nôkố ối dâng 3% rơpŏng kơtiê.

Châ hên mâu tơmeăm, tê hlối yă kơnâ mâu tơmeăm pêi lo ing chiâk deăng xiâm môi tiah kơphế, tiu, sầu riêng gum pêi lo liăn rêm ngế tâk hên sap nah tá chói ai, nôkố hiăng châ 81,8 rơtuh môi ngế tung môi hơnăm, ối má péa kơpong Tây Nguyên (kơ’nâi Lâm Đồng). Pôa Hồ Văn Mười, Kăn hnê ngăn Vi ƀan kong pơlê Dak Nông ăm ‘nâi, hơnăm 2025 kong pơlê kô tơbleăng pro sap ing 1 troh 4 toăng hngêi kơmăi pro bauxite – alumin - nhôm, kơnâ rêm toăng cho pá xôp 1 rơtal dollars. Ƀă liăn ngân ‘no pêi cheăng dâng 8 rơtal dollars Mih, kô pro tơ’lêi hlâu ăm kong pơlê Dak Nông mơnhông rơdêi tâ tung la ngiâ.