Deăng loăng plâi kâ Rossi a troăng Trần Hưng Đạo, bêng Đạt Hiếu, pơlê kong krâm Ƀuôn Hồ cho môi tung mâu deăng kơphế ƀă kơxu xua Pơhlăng mơjiâng a kong pơlê Dak Lak a hơnăm 1926 nah. Kố cho tíu ki vâ mơnhên tối hnoăng cheăng tơplâ dêi kăch măng a Tây Nguyên tung 2 hneăng tơplâ xâ dêi hdroâng mơngế. Ki rơhêng vâ tối, cho hneăng ki xông pơplâ xâ Mih nah, a Deăng Rossi hiăng châ mơjiâng môi khu Đảng, mơjiâng môi chi đoân droh rơtăm ƀă đông dêi yu kit ai 16 ngế kŏng nhân veăng cheăng.

Kŏng nhân ƀă kăn pơkuâ deăng Rossi hiăng veăng gum kế tơmeăm, phái kâ, pháu hơnêa ăm kăch măng; gum Khu rak ngăn ‘na liăn ngân-tơmeăm khoăng kong pơlê Dak Lak pơhlêh rôe lối hrĭng tâ̆n kế tơmeăm vâ pơto troh a kơpong đông kăch măng ki ê dêi kong pơlê kố.

Ing hơnăm 2018, Deăng loăng plâ Rossi hiăng châ Vi ƀan hnê ngăn kong pơlê Dak Lak pơtối mơnhên Inâi dêi hnoăng rak vế tơdroăng chal nah dêi kong pơlê. Dế nôkố, akố ối ai tơmeăm khoăng, môi tiah hngêi trăng ƀă tíu pêi cheăng dêi kăn pơkuâ ngăn deăng kố, klôh têa, hơpiâp on, hnôu ‘măn hmốu, têa ki mơ’no xuân ối rak vế môi tiah ton tơmeăm khoăng ki mê. Vâ pơtối rak vế, mơdêk ki kơnía dêi Deăng loăng plâi Rossi akố vâ ‘mot tơmối mot ôm hyô. Tiê̆n sih Lương Thanh Sơn, Kăn hnê ngăn Hngêi rak tơmeăm dêi kong pơlê Dak Lak hneăng hdrối tối tiah kố, kal ai troăng hơlâ ki nhên vâ ngăn tơmeăm khoăng ki kơnía git kố. Jâ Lương Thanh Sơn tối, kal athế ngăn i nhên, i tŭm tơdroăng ‘na tơmeăm khoăng ki kố”:

“Pin bu ngăn nhên to hngêi dêi ngế kăn ki pơkuâ deăng mê, la ta hâi teăm ngăn nhên hngêi trá xŏn dêi mâu ngế kŏng nhân dêi Rơđế akố. Tâi tâng mâu tíu tâ tá cho mâu kŏng nhân hiăng têng kong tôu tơmu kong mêi vâ khoh pêi mơjiâng kloăng kơphế a deăng ki kố. Tiah mê, achê Deăng loăng plâi Rossi kố ai pơlê ki lâi, ối to lâi toăng hngêi trá xŏn, mê cho môi pâ ki kal dêi Deăng, ôh tá xê ngăn to Deăng ki mê, tiah lâi pin pêi pro tơdjêp pơla Deăng ki mê ƀă pơlê cheăm vâ tơ’mot tơmối mot ôm hyô”.

Dế nôkố, khu kăn hnê ngăn dế tăng troăng vâ ‘mâi rơnêu, mơjiâng pro tơmeăm khoăng ki hiăng mơjiâng tung Deăng loăng plâi Rossi kố, tơdrêng amê, hnối ai tá tơdroăng ki vâ tơbleăng, tơ’mot tơmối mot ôm hyô ƀă hên mâu tơdroăng ki ê. Pôa Y Čing Mlô – Phŏ kăn hnê ngăn Vi ƀan pơlê kong krâm Ƀuôn Hồ tối:

“Klêi kơ’nâi mơjiâng pro mâu tơmeăm tung Deăng ki kố, mê pơlê kong krâm kô tơkŭm mơhnhôk kuăn pơlê pleăng dêi tơmeăm khoăng vâ mơhno tơbleăng, vêh mơjiâng troăng ki vâ tơ’mot tơmối mot ôm hyô tơrŭm ƀă pơlê cheăm, hnối ai tá tơdroăng cheăng ki ê. Xuân pâ thế kong pơlê mơhno tơbleăng tơmeăm khoăng kố cho tíu ki vâ tơ’mot tơmối mot ôm hyô. Ngin xuân ai pơkâ, hnê thế, tơrŭm cheăng ƀă mâu kơvâ cheăng, ki malối cho kơvâ hnê hriâm vâ rah xo tíu ki kố chiâng tíu ki vâ hnê hriâm tơdroăng kal git roh vâi krâ nah, pơtối mơdêk tơ’nôm ki kơnía dêi tơdroăng roh nah”.