Rơtế ƀă tơdroăng ki tơkŭm po hên tơdroăng pơkâ mơdêk ‘no liăn cheăng, tê mơdró, tơdjêp troăng prôk, mơđah tơbleăng ki rơdêi ƀă mâu tơmeăm pêi lo ing chiâk deăng xiâm dêi mâu kong pơlê troh ƀă mâu vâi pú tung tơnêi têa ƀă kong têa ê, tơdroăng cheăng tơrŭm pơla Pơlê kong kân Hồ Chí Minh bă 5 to kong pơlê kơpong Tây Nguyên hiăng rế hía rế châ tơtrŏng, ƀă 23 tơdroăng ki kal tơrŭm cheăng hiăng châ tơbleăng.

Tung mê, krê rôh hôp pơkâ mơdêk ‘no liăn cheăng xua Pơlê kong kân Hồ Chí Minh tơkŭm po a khế 4/2024 hiăng gum 5 to kong pơlê kơpong Tây Nguyên krếo thế ‘no liăn cheăng tung 558 tơdroăng tơkêa, ƀă tâi tâng kơxô̆ liăn lối 300 rơpâu rơtal; hên hlá mơ-éa chôu vế tơrŭm cheăng tung kơvâ khăm pơlât, tŏng gum rêh ối pơlê pơla xuân châ kĭ tơkêa ƀă rế hía rế tơbleăng châ tơƀrê.

Rôh hôp xuân mơdoh hên chôu tơpui tơno mâu tơdroăng ki kal ‘na ‘no liăn cheăng ăm tơdroăng ki tê, mơjiâng kơpong pêt tơniăn ƀă ai hlâu tơrŭm cheăng tung kơvâ pêi chiâk deăng; mơjiâng túa tơrŭm pêi chiâk deăng păn ká xi xŏng, pêi chiâk deăng xúa kơmăi kơmok chal nếo tơrŭm ôm hyô kong kế nhâ loăng’ mơdêk tơdroăng tơrŭm séa ngăn ki dâi lĕm dêi kế tơmeăm pơla Pơlê kong kân Hồ Chí Minh ƀă mâu kong pơlê kơpong Tây Nguyên.