Pôa Trần Thanh Mẫn, Kăn xiâm hnê ngăn Kuô̆k hô̆i hiăng lăm pôu, ƀă hbruô tơmeăm ăm ai hnoăng tơnêi têa, mơngế kơtiê xơpá tung kong pơlê Hậu Giang drêng vâ troh Tết Ất Tỵ 2025. Ai 350 kơxu tơmeăm Têt hiăng châ pôa Trần Thanh Mẫn, Kăn xiâm hnê ngăn Kuô̆k hô̆i ƀă Khu kăn troh diâp tơmeăm ăm mâu rơpŏng, kŏng nhân pêi cheăng ƀă mơngế kuăn ngo tung tơring Châu Thành A ƀă Phụng Hiệp, mơhno ki Đảng, tơnêi têa tơmâng, tŏng gum mâu ngế kơtiê xơpá, malối a rêm rôh troh Têt rơnó hơngui vêh.

Kăn xiâm hnê ngăn Kuô̆k hô̆i hlối khĕn kơdeăn mâu cheăm, tơring tung kong pơlê hiăng pêi tro tơdroăng tơniăn rêh ối kuăn pơlê, tung mê, ai tơring Châu Thành A, mơhế ối hên xơpá la hiăng mơhnhôk mơjiâng pro 185 toăng hngêi Tơrŭm tuăn, gum vâ chê 2.500 kơxu tơmeăm Têt ăm mâu ngế kơtiê ƀă tâi tâng kơxô̆ liăn lối 1,5 rơtal liăn.