Troăng kân sap cheăm Đắk Tơ Ve prôk kĕn cheăm Hà Tây, tơring Chư Păh, châ mơjiâng pro ing kơxô̆ liăn Tơdroăng 179, hiăng pro pơhlêh tơdroăng prôk lăm dêi kuăn pơlê a kố. Hdrối nah, troăng ki kố đi tro hlâu trâp tơnêi tơhnah a rơnó mêi, pro pá ăm tơdroăng prôk lăm ƀă chơ tơmeăm. La ƀă tơdroăng no liăn ‘mâi rơnêu pro, troăng xŏn 10 km ƀă hlối kân rơdâ 5,5m hiăng pê klêi, hiăng kum kuăn pơlê a cheăng ki xơpá má môi dêi tơring tơ ‘lêi hlâu chơ dêi báu alâi, plâi, pôm, mơnhông cheăng kâ.           Tơdrêng amê, Tơdroăng 1719 tung pái hơnăm hdrối hiăng mơhno ki pơ’lêh nhên khât ‘na cheăng kâ - rêh ối ăm tơring Chư Păh. Kơxô̆ rơpŏng kơtiê tung tơring hiăng kơdroh 3,82% tâng vâ pơchông ƀă hơnăm 2021 kơnôm pêi mâu pơkâ tŏng gum ing mâu tơdroăng tơkêa bro ƀă Tơdroăng Pơkâ dêi Tơnêi têa. Mâu túa mơnhông cheăng kâ tung kuăn pơlê mê cho pêt báu klâng, păn mơnăn hiăng kum hên rơ pŏng hngêi pêi cheăng châ liăn hên tơniăn. Pôa Luyên Ngọc Toàn, Ngế pơkuâ Ƀơrô Kuăn ngo tơring Chư Păh, ăm ‘nâi:

“Bă tâi tâi kơlo liăn ‘no pêi cheăng ing 143 rơtal liăn tơbleăng pêi mâu tơdroăng tơkêa bro, tâi tâng mâu kơvâ cheăng kâ - rêh ối, kring tơniăn. Tơdroăng mê hiăng tơdjâk troh tơdrêng troh rêh ối tơmeăm khoăng ƀă tuăn ngôa dêi kuăn ngo, pro ai mâu hngêi lĕm, kô ăm mơngế kơtiê, pro têa krúa ăm kuăn pơlê; pro hngêi trung hriâm, hngêi pơkeăng, hnê cheăng pêi, gum tung rêh ối rế châ tơmâng khât”.

Môi tiah mê, a tơring Phú Thiện, Tơdroăng 1719 hiăng pro pơxúa hên tung tơdroăng mơjiâng pro tíu pêi cheăng, troăng prôk ƀă mơnhông tơƀrê tơdroăng rêh ối kuăn pơlê. Mâu kăn hiăng tơmâng tŏng kum pro troăng prôk troh a pơla mâu cheăm, kâng rơchôa pro hlâu tung pêi chiâk ƀă ‘na troăng prôk. Malối mâu túa cheăng kâ pêt loăng plâi, păn ro, chu, í pêap tiô troăng krá tơniăn hiăng kum hrĭng rơpŏng kuăn pơlê pêi cheăng kâ lo liăn tơniăn.

Kơnôm a tơdroăng kơjo kum ing mâu tơdroăng tơkêa bro, kơxô̆ rơpŏng kơtiê tung tơring hiăng kơdroh sap 13% chu ối 7,5%. Pôa Nguyễn Anh Tuấn Ngế pơkuâ hnê ngăn cheăng Đảng tơring, Kăn phŏ hnê ngăn Vi ƀan kuăn pơlê dêi tơring Phú Thiện ăm ‘nâi: 

“Vi ƀan kuăn pơlê tơring Phú Thiện hiăng ‘nâi plĕng ăm Khu kăn pơkuâ hnê ngăn Đảng tơring, mơjiâng pơkâ tơbleăng pêi inhên. Mâu kơ koan cheăng tro kơvâ tơná pêi ƀă khu ngăn ƀơrô hiăng hnê pêi pơ’lêh tơƀrê ƀă tơdroăng pơkâ nhên vâ gum ‘na tơdroăng xo liăn châ pêi cheăng. Klêi kơ’nâi 3 hơnăm tơbleăng, tơring hiăng xo liăn ngân ‘no vâ pêi cheăng, châ 45 rơtal liăn, vâ chê 5%”.

Tung pái hơnăm tơbleăng pêi Tơdroăng 1719, kong pơlê Gia lai hiăng pêi châ hên tơdroăng tơƀrê. Troh nôkố, kong pơlê hiăng pêi klêi 12/31 tơdroăng pơkâ, lơ pêi châ tơdroăng pơkâ. Malối, tơdroăng pro pơlê nếo ƀă xing xoăng tơniăn ăm rơpŏng lăm rêh ối a pơlê nếo ki pa kong pơkâ châ 97% luâ 2% tâng vâ pơchông ƀă tơdroăng pơkâ. Kơxô̆ thôn pơlê ai troăng ô tô kơtâu troh tơring ai 100%, um tơdjêp mâu ƀă kơpong ki xơpá.

Lối 87% rơpŏng kuăn pơlê  kuăn ngo châ xúa têa krúa. Lối 98% thôn ai hngêi tí dế a tíu hêi tơkŭm hôp dêi kuăn pơlê, ƀă 80% thôn tơkŭm pêi pro mơhno túa lĕm tro, hơdruê xuăng. Kơxô̆ rơpŏng kơtiê tung mâu kuăn ngo kơdroh vâ chê 13%, kơdroh 4,3% tâng pơchông ƀă hơnăm 2021. Pôa Trường Trung Tuyến - Phŏ hnê ngăn Kuăn ngo kong pơlê Gia Lai ăm ‘nâi tung la ngiâ, rêm râ ủy kal pơtối rak vế pêi pro hnoăng cheăng, hnê mơhno nhên vâ tơdroăng pơtối pro pơxúa khât, kum kuăn pơlê hdroâng kuăn ngo mơnhông krá tơniăn:

“Tung la ngiâ cho rôh ki kal, veăng dêi khu râ kăn Đảng rêm râ . ‘Na peăng kuăn ngo pơtối tăng ‘nâi plĕng ăm Vi ƀan Kuăn pơlê dêi kong pơlê tăng ngăn nếo mâu tơdroăng ki kal tung pơla hdrối nah hiăng tơbleăng ối tơvâ tơvân vâ tah, mơ-eăm mơhnhôk tăng ƀă tơdroăng tơnêi têa ƀă kuăn pơlê rơtế pêi vâ mâu kuăn pơlê kuăn ngo pơtối rak vế’’.