Pôa Cao Dáng krâ pơlê, kuăn ngo Raglai, ối a thôn A Xây hdrối nah hiăng hên hơnăm cho Kăn hnê ngăn Vi ƀan kuăn pơlê, Kăn pơkuâ hnê ngăn cheăng Đảng ủy cheăm Khánh Nam, tơring Khánh Vĩnh môi tơring ai troh 80% kuăn pơlê cho kuăn ngo. Tung mâu hơnăm ki mê, kuăn pơlê xuân ối hrâ mơnguâ, kơtiê. Pôa Cao Dáng hiăng khên pơhlêh ing chối báu chiâk klêi mê pêi klâng, chiâ klôh păn ká, pêt kơtếo, pêt krui ƀŏng... Nôkố rơpŏng hngêi ai 2 ha kơtếo, 2 ha loăng nhĕn lai, 3 sao krui bŏng kơtôu drêh châ xo dêi plâi hên tơniăn.

Hlo pôa Cao Dáng pêi cheăng kâ châ tơƀrê, kuăn pơlê hdroâng kuăn ngo tung thôn, pơlê, cheăm pêi trối, ing mê, hên rơpŏng hngêi hiăng hluăn kơtiê. Pôa ăm ‘nâi:  

“Kuăn pơlê tung thôn ngăn pin pêi, vâi hriâm ƀối. Pêt loăng plâi kâ  thế ai phon rơvât, po văng krúa kơdrum loăng, toh têa vâ loăng rĕng kân, rĕng ai plâi. Kuăn pơlê hdroâng Raglai vâi hlo pin pêi ai pơxúa tơƀrê vâi pêi ƀối há. A hnê kuăn pơlê pêi. Hdrối nah, tung thôn kố iâ ngế pêi la troh nôkố hiăng hên rơpŏng hngêi pêt loăng plâi kâ, pro kơdrum deăng”.

Mơ’nui hơnăm 2021, tơring Khánh Sơn ối vâ chê 5.000 rơpŏng kơtiê, rơpŏng vâ chê kơtiê, kơlo hên lối 66% kơxô̆ pơ’leăng mâ mơngế ối tung môi pơlê; ‘na tơring Khánh Vĩnh ối lối 5.000 rơpŏng kơtiê, rơpŏng vâ chê kơtiê, vâ chê 60% kơxô̆  pơ’leăng mâ mơngế ối tung môi pơlê. Xua mê  kố cho 2 tung kơxô̆ 74 tơring kơtiê tung lâp tơnêi têa pơla hơnăm 2021-2025.

Ƀă tơdroăng ki mơ-eăm djâ 2 tơring rĕng hluăn ing tơring kơtiê, kong pơlê Khánh Hòa hiăng tơkŭm liăn ngân dêi Tíu xiâm, kong pơlê, tơring mơhnhôk tăng ing hên khu ki pơrá phá vâ ‘no liăn cheăng pêi tơdrêng mâu troăng hơlâ mơnhông cheăng kâ - rêh ối. Pakĭng ‘no liăn cheăng, kong pơlê Khánh Hòa tơmâng khât mâu túa cheăng kâ, mơdêk pêi lo liăn, xăm kơtiê ăm tơrêm rơpŏng kuăn pơlê. Mâu túa pơ’lêh hdrê loăng pêt, păn mơnăn châ tơbleăng hnê troh a mâu thôn, pơlê. Ôh tá xê to hriâm, kum hdrê pêt mê mâu đảng viên, mơngế kuăn pơlê pâ nhoăm ối pêi hdrối, pêi vâ kuăn pơlê pêi ƀối.

Mâu ngế kuăn pơlê pâ nhoăm  ối hnê tối, mơhnhôk mơdêk hlê plĕng, ai tuăn mơ-eăm dêi mâu rơpŏng hngêi, rơpŏng kơtiê. Krâ pơlê inâi Mấu Xuân Nghi, ối a thôn Dốc Gạo, pơlê kân Tô Hạp, tơring Khánh Sơn, kong pơlê Khánh Hòa ăm ‘nâi:

“Pêi cheăng kâ ki hên cho pêt sầu riêng, pêt tơvât ƀă priât vâ ai kế kâ rêm hâi. Mơngế hdroâng kuăn ngo rôh apoăng pêt iâ  xua hâi hlê túa pêi. Ngin tối ăm vâi, châ Tơnêi têa tơmâng tŏng kum hriâm hnê tơdrêng pêt loăng plâi, nôkố hên mơngế pêt. Ngế ki pêt iâ xuân châ 200 xiâm, ai ngế ki pêt hên tâ châ hectar, ai rơpŏng hngêi hiăng chiâng kro mơdrŏng”.

4 hơnăm hdrối, liăn ngăn xiâm tơnêi têa ƀă kong pơlê hiăng ‘no ăm tơring Khánh Sơn lối 600 rơtal liăn. Troh mơ’nui hơnăm 2024, môi tung mâu tíu ki bâ eăng má môi dêi tơring cho hiăng pêi châ tiô mâu pơkâ hluăn  ing tơring kơtiê; kơxô̆ rơpŏng kơtiê, vâ chê kơtiê kơdroh rĕng bú ối lối 31%. Pêi lo liăn rêm ngế dêi tơring châ 36,12 rơtuh liăn/ngế/hơnăm, tâk luâ péa hdroh tâng pơchông ƀă hơnăm 2020.

Troh nôkố, Khánh Sơn hiăng hluăn ing inâi tơring kơtiê, rĕng tâ châ 1 hơnăm tâng pơchông ƀă Pơkâ hneăng Hôp kân Đảng ƀô̆ tơring, cho xiâm ki kal vâ tơring pêi tiô mâu troăng pơkâ ki kân tâ. Pôa Bùi Hoài Nam, Kăn hnê ngăn Đảng tơring Khánh Sơn ăm ‘nâi, pêi chiâk dế cho kơvâ pêi cheăng kâ ki xiâm châ lối 70% tung tâi tâng luât pơkâ cheăng kâ, xuân cho khuă vâ tơring “tah kơtiê’’ rĕng tung mâu hơnăm achê kố ƀă tơngah kô châ po troăng kum kuăn pơlê mơ-eăm mơnhông chiâng rơpŏng kro mơdrŏng.

Lâp tung tơring ai 29 ngế châ pơ-eăng ai ngế nhoăm pâ, tung mê, ai 24 ngế cho đảng viên, kố cho mơngế ki xiâm vâ tơring pơkâ mâu tơdroăng pêi hên tâ tung la ngiâ. Pôa Bùi Hoài Nam tối:  

“Mơdêk hnoăng cheăng pêi dêi ngế kuăn pơlê pâ nhoăm, vâi cho mơngế pê lo liăn hên ing mâu túa pêi chiâk deăng a tơring Khánh Sơn. Ing mê, pơtối po rơdâ mâu túa pêi pro, mơdêk hlê plĕng rak vế hyôh kong prâi, kuăn pơlê mơ-eăm pêi chiâk, pêi kơdrum deăng vâ pro kro mơdrŏng tơxâng ƀă ivá tơná. La ngiâ, tơring kô tơbleăng pơkâ to lâi rơpŏng hluăn  kơtiê krá tơniăn, kơlo ki hên iâ kơxô̆ rơpŏng kro mơdrŏng tung mâu hdroâng kuăn ngo”.

Pôa Nghiêm Xuân Thành, Kăn pơkuâ hnê ngăn cheăng Đảng kong pơlê  Khánh Hòa hiăng pơkâ 2 tơring Khánh Sơn, Khánh Vĩnh klêi châ mơnhên hluăn ing tơring kơtiê, mơ-eăm ôh tá vâ pơtối kơtiê mê thế mơnhông chiâng tơring kro mơdrŏng, tơring kro mơdrŏng ƀă ivá tơná. Vâ tiah mê, mâu tơring cheăm kal xing xoăng kơxô̆ liăn ‘no mơjiâng tơmeăm khoăng. Tơdroăng ‘no liăn thế ai ki kal xiâm, pro xiâm ki mơ-eăm mơnhông. Tiô pôa Nghiêm Xuân Thành, mâu cheăm, tơring kal tơtrŏng tơdroăng mơnhông hên túa mâu hdrê pêt ai pơxúa kân, mơnhông krá tơniăn rơtế ƀă pêi pro ƀă kring vế hyôh kong prâi: 

“Đảng viên prôk hdrối, kuăn pơlê prôk kơ’nâi ‘na mơnhông pêi chiâk pro pơxúa tơƀrê hên, hâk phiu khât. Mâu kăn hiăng tơbleăng tơdroăng tơkêa pro, hnê tối,  mơhnhôk kuăn pơlê ƀă pêi hdrối. Mâu kăn a kong pơlê  hiăng hnê djâ hlối veăng tơmâng dêi mâu kăn. Tíu ki tơƀrê dêi kong pơlê Khánh Hòa cho pro kơdrŏng rơpŏng kơtiê, tâk rơpŏng chía hôm, rơpŏng kro mơdrŏng. 2 tơring hluăn kơtiê hdrối 1 hơnăm, kố cho ki mơ-eăm kân. Hluăn kơtiê cho rôh pêi cheăng tơƀrê tro má môi”.