Thái Kpă Pual, cho tơdroăng ki mơhúa vâ chiâng  ngế ki “rơkê” tung kơvâ cheăng hriăn ngăn nâl tơpui Jarai cho a hơnăm 2008, Hngêi trung Đăi hok Tây Nguyên po kơvâ Yăo yuk Tiêuh hok nâl Jarai. Kố cho kơvâ ki nếo, cho ki kal, tá hâi ai thái hnê. Thái Kpă Pual châ Khu ngăn hnê hriâm ƀă Hnê mơjiâng tuăn ngoâ rơkê kong pơlê Gia Lai tơbleăng pro thái hnê ăm hngêi trung Đăi hok Tây Nguyên; rế hnê vâ pro thái cô ăm hngêi trung, rế hnê ăm sinh viên. Klêi mê, pôa châ Khu ngăn hnê hriâm ƀă hnê mơjiâng tuăn ngoâ rơkê thế veăng chêh hlá mơ-éa hriâm nâl Jarai ing lâm 1 troh lâm 5. Rơtế amê, Viện Khoa học Giáo dục (Khu xiâm ngăn hnê hriâm ƀă hnê mơjiâng tuăn ngoâ rơkê) thế veăng hriăn ngăn, chêh hlá mơ-éa hriâm pơla péa nâl Jarai, Mơ-éa xúa ăm Tơdroăng rak vế ki rơkê plĕng dêi tơdroăng hnê hriâm a hngêi trung (SEQAP).

“Tơná á mê hriâm ‘na chuyên ngành Toán, laga á hlo nâl Jarai ngin xuân ối iâ ngế hriăn ngăn tăng ‘nâi, xua mê á xuân tí tăng ‘nâi xêh, tí tăng tơkŭm vâ rak vế ƀă ki xiâm cho vâ hnê pơtó ăm mâu rơxông kơ’nâi. Á hlo túa lĕm tro dêi mơngế Jarai ối ai hên ki lĕm mê iâ ngế hêng vâ tăng ‘nâi vâ rak vế. Á xuân rơhêng vâ ôh ti xê to tơná á mê mâu ngế ki vâ tăng ‘nâi ‘na chư chêh nâl tơpui Jarai athế rơtế ƀă dêi rơpó hriăn ngăn môi tuăn vâ pôi tá hía lôi túa lĕm tro khôi hmâ dêi hdroâng kuăn ngo tơná”.

Kot mâ ƀă xông kân ing pơlê cheăm tung pơla hriâm tâp, mê tung pơla hnê, hriăn ngăn, chêh, thái yăo Kpă Pual hiăng xúa ki rơkê plĕng tung tơdroăng rêh ối dêi mơngế Jarai tiô túa ki rơkê má môi. Malối, mâu rơking tơpui tối, mâu tơdroăng ki hnê khê̆n, rơkong hơ’muăn dêi mơngế Jarai hiăng châ pôa chêh ‘mot tung mơéa, vâ veăng rak vế túa lĕm tro hdroâng kuăn ngo tơná.

“Mâu ƀai chêh, mâu rơkong tơpui, mâu chư chêh mê ngin chêh ‘măn vâ rak vế, pơrá ing tơdroăng ki ai khât tung rêh ối dêi hdroâng kuăn ngo Jarai. Mê cho mâu rơkong tơpui châ tơkŭm ing tơdroăng rêh ối tíu pơlê cheăm, mâu rơkong hơ’muăn hơdrôu ing hngế pro pơxúa ‘na hnê hriâm. Mơni kô cho mâu rơkong tơpui ‘na tơdroăng cheăng rêm hâi, ‘na túa ki rak vế cheăng khôi hmâ ƀă hên ki ê tâi tâng mâu tơdroăng mê ngin chêh ‘măn vâ hnê tối ăm mâu rơxông kơ’nâi”.

Kpă Pual hên hơnăm pêi cheăng tung kơvâ hnê hriâm a kơpong xơpá Krông Pa, Gia Lai. Apoăng bu veăng hnê tung mâu hneăng sơ râ sư phạm 1 hơnăm mê hiăng lo hnê hriâm, klêi châ hriâm Trung kâ̆p sư phăm a Kon Tum. Klêi kơ’nâi hiăng hriâm klêi, vêh hnê a cheăm châ 3 hơnăm, thái Kpă Pual pơtối pâ hriâm Đăi hok rế hriâm rế pêi dêi Quy Nhơn. Tung pơla hnê, pôa hiăng ai lối 10 hơnăm pro thái pơkuâ hngêi trung, mê nếo cho phŏ pơkuâ Khu ngăn hnê hriâm ƀă hnê mơjiâng tuăn ngoâ rơkê kong pơlê Gia Lai, pro Ngế xiâm pơkuâ Khu hnê hriâm hdroâng kuăn ngo. La klêi mê, Thái Kpă Pual pơtối pâ vêh dêi a cheăm pơlê, pro thái tá troh pôa pơtê cheăng.

“Troh hơnăm pơtê la ôh tá pơtê cheăng”, nôkố vêh ƀă pơlê cheăm, la thái Kpă Pual xuân ối kơhnâ hriăn ngăn, veăng tung hô̆i đong mơnhên hlá  mơ-éa hriâm nâl Jarai dêi Khu xiâm ngăn hnê hriâm ƀă hnê mơjiâng tuăn ngoâ rơkê, tơdrêng amê hlối veăng hnê a mâu hneăng ki hnê nâl Jarai ăm kăn ƀô̆ a cheăm pơlê:

“Tơdroăng ki rak vế nâl tơpui dêi Jarai gá kal khât, tung mâu câu thành ngữ vâ tơpui ‘na khôi túa lơ mâu tơdroăng ki hnê pơchân ing tơdroăng ki hnê hriâm ăm mâu kuăn cháu mê kal athế xúa ƀă nâl tơpui dêi Jarai mê gá nếo hnê mơhno châ ki pơxúa khât. Tung pơla tăng ‘nâi mê ngin xuân hiăng xúa péa nâl tơpui, ai drêng ‘nâ tung nâl Xuăn mê xuân ôh tá tơpui leăng tŭm ki pơxúa dêi gá, mê athế vâ tơpui ƀă nâl Jarai mê nếo tối tâi ki pơxúa dêi ngế ki mê vâ pơtroh ăm”.

Kơhnâ ƀă chư chêh, thái yăo Kpă Pual cho ngế ki djâ troăng ahdrối ‘na hiâm mơno hâk vâ, kơhnâ hnê nâl Jarai ăm mâu rơxông kơ’nâi.