Vi ƀan hnê ngăn kong pơlê Kon Tum hiăng pơkâ tŏng gum mâu rơpŏng kơtiê ƀă rơpŏng vâ chê kơtiê kâ Têt Lo hơnăm nếo Ất Tỵ. Rêm rơpŏng kơtiê a kong pơlê Kon Tum châ gum 600 rơpâu liăn ƀă rêm rơpŏng vâ chê kơtiê châ gum 300 rơpâu liăn vâ kâ Têt Lo hơnăm nếo Ất Tỵ. Tâi tâng kơxô̆ liăn gum rôh kố cho 6 rơtal liăn.

Vi ƀan hnê ngăn kong pơlê Kon Tum pơkâ thế mâu tơring, pơlê kong kơdrâm xúa kơxô̆ liăn dêi kong pơlê pơcháu ăm hơnăm 2025 vâ pêi pro tơdroăng kố. Ƀă kơxô̆ liăn tŏng gum rơpŏng vâ chê kơtiê mâu tơring, pơlê kong kơdrâm tơrŭm ƀă Vi ƀan Măt trâ̆n Tơnêi têa Việt Nam rơtế tŏng gum ƀă khu tơrŭm hô̆i, đoàn theh veăng tơlo, tơdah xo ƀă xing xoăng sap ing mâu kơxô̆ liăn ki tŏng gum dêi khu tơrŭm, mâu ngế krê ing Khu râng liăn gum mâu kơtiê tơdrêng amê hlối xing xoăng kơxô̆ liăn vâ pêi pro.

Mơ’nui hơnăm kố nah, tung lâp kong pơlê ối 6.557 rơpŏng kơtiê (kơxô̆ rơpŏng ki tâk chu cho 4,31% tâng vâ pơchông ƀă tâi tâng kơxô̆ rơpŏng kuăn pơlê tung lâp kong pơlê). ‘Na rơpŏng vâ chê kơtiê tung lâp kong pơlê ối 5.547 rơpŏng (kơxô̆ ki tâk chu cho 3,65%).