Tơpui hnê mơhno a rôh hôp, pôa Tô Lâm, Kăn xiâm pơkuâ hnê ngăn cheăng Đảng tối nhên, khoa hok kong ngê̆ cho ivá ki kal xiâm tung pơla mơnhông cheăng kâ rêh ối dêi hên kong têa tung lâp plâi tơnêi gum mơdêk ki rơkê plĕng tung tơdroăng cheăng ƀă ivá cheăng tơxup tơbriât dêi tơnêi têa. Xua mê, ƀă tơdroăng ki vâ chiâng kong têa cheăng ƀă kơmăi kơmok rơkê plĕng a hơnăm 2030 ƀă kong têa mơnhông, pêi lo liăn hên a hơnăm 2045, lâp tơnêi têa athế ngăn khoa hok, kong ngê̆, pơhlêh nếo ƀă pơhlêh kơxô̆ cho ivá ki xiâm.

‘Na hnoăng cheăng dêi khu pơkuâ tơdroăng kal kí tung la ngiâ, kăn xiâm pơkuâ hnê ngăn cheăng Đảng pơkâ thế, vâ ăm Pơkâ châ mot trâu hơngế tung tơdroăng rêh ối tiô túa ki tơƀrê ƀă teăm tơdrêng; rêm râ, mâu kơvâ cheăng, mâu kong pơlê athế mơ-eăm pêi cheăng, pôi tá pêi pro hrá. Kăn xiâm pơkuâ hnê ngăn cheăng Đảng pơkâ thế, rĕng pêi klêi tơdroăng pơkâ, tŏng gum tung hơnăm 2025, rế rĕng rế ‘ló athế pêi klêi tơdroăng ‘mâi rơnêu, ‘mot tơ’nôm pơkâ nếo mâu tơdroăng pơkâ dêi luât, troăng tŏng gum mâu tơdroăng ki pá puât, vâ mơnhông khoa hok, kong ngê̆, pơhlêh nếo tơmiât rơkê ƀă pơhlêh kơxô̆, tŏng gum pro tơ’lêi hlâu tơdroăng tơmiât, mơhnhôk khên pêi, khên tơmiât, khên pôu râng dêi hnoăng.