Pêi pro mâu tơdroăng tŏng gum, gâk kring hnoăng ƀă ki pơxúa tơxâng dêi kăn ƀô̆ thái cô ƀă mơngế pêi cheăng, sap apoăng hơnăm hriâm 2024 – 2025 troh nôkố, Kŏng đoân hnê hriâm Dak Lak hiăng mơhnhôk veăng tơlo Kơxô̆ liăn tŏng gum đoân viên, ngế pêi cheăng kŏng đoân lâp kong pơlê châ lối 500 rơtuh liăn.

Tung roh Têt Lo hơnăm nếo Ất Tỵ kố, kŏng đoân kơvâ hnê hriâm Dak Lak tơkŭm po tơdroăng rơhdruê xuăng, xo ki pon mơhúa apoăng rơnó hơngui ƀă trâm mâ hôp Têt tiô khôi vâi krâ nah tung kăn ƀô̆ thái cô ƀă mơngế pêi cheăng. Mơhnhôk mâu kơxô̆ liăn diâp kơxuô tơmeăm Têt mâu kăn ƀô̆ thái cô ƀă mơngế pêi cheăng ai tơdroăng rêh ối pá puât, ngế tro tâ pơreăng ki ôh tá ai pơkeăng pơlât ƀă tâi tâng kơnâ mâu kơxuô tơmeăm cho vâ chê 600 rơtuh liăn.