Ƀuôn K’La cheăm Dray Sáp xuân môi tiah mâu pơlê Rơđế a kong pơlê Dak Lak, ƀă troăng prôk tung thôn pơlê nếo ƀă mâu kơdrum loăng kơphế tung mâu hngêi trá xŏn. La tung dế dêi ƀuôn Kla cho tơdroăng ki phá tơviah ƀă môi toăng hngêi kơmăi uâ pơliê kơphế plâ hâi tâ ki xú hŏm lĕm. Mê cho hngêi kơmăi dêi kŏng ti Tơlo liăn Êđê Café.

 Ngoh Y Pôt Niê - ngế ki mơjiâng ƀă cho ngế pơkuâ dêi kŏng ti xuân dế ối akố. Ngoh rế pơkuâ ngăn kơmăi kơ-óu, uâ, um, kŏng rế pêi – rơkong rế tơpui, tơmiât tơdroăng kal ‘na kơxô̆, ‘na tơdroăng khu mơdró kâ tơná xúa kơmăi kơmok chal nếo vâ mơjiâng chiâng mâu túa kơphế ki dâi lĕm.

Klêi kơ’nâi 4 hơnăm pơxiâm pêi cheăng, sap ing môi ngế ƀok thái pơkeăng vêh ƀă tơdroăng cheăng pêi kơphế, ngoh Y Pôt Niê hiăng tơkâ luâ hên xơpá ‘na tơdroăng ki xơpá nâl tơpui, xơpá ‘na liăn ngân ƀă tơdroăng ki rơkê plĕng. Ngoh tối, á mơhúa khât drêng sap ing apoăng hiăng ngăn nhuô̆m tơdroăng tơrŭm pơla túa lĕm tro ƀă tê mơdró. Tơmeăm “Cà phê ngôi on” rơtế ƀă tơdroăng ki ‘nân ối a hơpiâp on hdréa, péa pơ-óu, póu pêi ƀă kŏng pêi kơhnâ dêi mâu nôu tung ƀuôn Kla drêng pêi lo mâu túa kơphế ki kố, hiăng gum ngoh tăng hlo hên tơmối ƀă tá mâu ngế ki veăng vâ pêi cheăng ƀă:

“Á mơhúa khât drêng nếo pơxiâm vâ pêi cheăng, pêi lo mâu tơmeăm ki apoăng, hiăng pro pơxúa troh ăm mâu kuăn mơngế rơtế ai tơdjuôm tơdroăng ki hâk vâ môi tiah á. Vâi hiăng krếo phôn pâ thế châ rơtế tơrŭm ƀă á. Ing mê, tơná á hiăng klâ xoăng châ mâu ngế cheăng tung kŏng ti. Ngế pơkuâ kơpong pêt ki hmâ pêt kơphế, ngế pơkuâ ngăn ‘na tơdroăng kơ-óu uâ. Tơná á cho ngế ki lăm tăng ‘nâi, lăm pơkâ mơdêk tê mơdró a mâu kong pơlê, veăng tung mâu rôh po kơchơ ƀă malối cho lăm pơkâ mơdêk tê mơdró a kong têa ê”.

Tơdroăng ki pá ‘na nâl tơpui châ pro tơ’lêi hlâu ƀă ivá mơ-eăm hriâm tâp ôh tá la lâi pơtê, nôkố Y Pôt Niê hiăng loi tơngah a dêi tơná tung mâu rôh lăm ngi kong têa Siam, Nhuk, Alơmăng, Canada ƀă hên mâu kong têa ki ê. Ƀuôn Kla ôh tá ai kơbố ƀă kơtăn hngế ing tíu xiâm Ƀuôn Ma Thuột, xuân ôh tá kâi pro pá ăm Êđê Café, xua tơmeăm pêi lo dêi kŏng ti dế châ tê a lâp lu mâu tíu tê mơdró điê̆n tưh. Sap ing mâu ngế ki krâ a ƀuôn Kla nôkố xuân ‘nâi ‘na túa pêi ki nếo a Êđê Café, hlo tơdroăng ki ‘ló, tơdroăng ki rơkê dêi mâu hơnăm ối nếo. Pâ Băm, 64 hơnăm, tối:

“Gá rơkê khât. Kơphế kloăng krí tum gá ‘nâi, krí ối drêh gá ‘nâi, krí ối kơbâng gá ‘nâi. Tâng kơphế pin krí gá hiăng tum tâi mê gá roê yă kơnâ. Kơphế krí ối drêh mê roê yă rơpâ, la xuân ôh ti rơpâ môi tiah mâu tíu tê vâi roê ôh. Tâng tíu ki vâi roê, roê 135 rơpâu liăn mê akố gá roê 136 – 137 rơpâu liăn tung môi kg”.

Tơkâ luâ xơpá, kơxô̆ liăn châ xo, liăn tơkâ châ pơhlêh tiô rêm hơnăm, Y Pôt hlo ro khât xua mâu tơdroăng ki tơná mơ-eăm hiăng pro pơxúa ăm tơdroăng kơnía krá tơniăn ăm pơlê cheăm.

Mâu hâi mơ’nui hơnăm 2024, Y Pôt Niê hiăng veăng hôp a Rôh hôp tơbleăng ngế pơchuât tơbleăng ‘no tơdrêng ing troăng hyôh internet dêi Tíu xiâm Đoân “hlê plĕng, pêi pro dêi droh rơtăm ‘na chal nếo ƀă ivá cheăng, pôu râng dêi mâu rơxông ối nếo”, ngoh rế loi tơngah tơ’nôm tiah kố mâu tơdroăng ki kơnía git ki tơná tiô ƀối kô ăm cheăng kơphế, ăm pơlê cheăm ƀă ăm mâu rơxông nếo troh ƀă mâu tơdroăng ƀlêi chiâng ki nếo:

"Tơná Y Pôt rơhêng vâ hnê pơtó vâ mâu vâi o kŭn ƀă mâu ngế cheăng ki nếo xo ah hmôi cho túa pêi kơphế dêi tơná vâ ăm vâi hlo ki kơnía dêi pêi chiâk deăng, kơnía dêi pơlê cheăm, vâ ăm mâu vâi hơnăm ối nếo hdroâng kuăn ngo ai tơdroăng pơhlêh túa tơmiât, pêi pro tro tâ, mơnhông mơdêk pêi chiâk deăng a pơlê cheăm rế hía rế krá rơdêi tâ”.