Tung mâu hơnăm hdrối, khu lêng kring vế ki pro đông a pơlê kong kơdrâm Phú Quốc đi đo rak vế kơtăng gâk hbrâ rơnáu tơplâ, ‘nâi nhên, mơnhên tối, tối tơbleăng tro tơdroăng, malối cho a mâu têa kơxĭ chuăn rơlốu, tơring cheăm ki kal. Rơkê tơƀrê ivá hbrâ rơnáu rak vế gâk kring tơdroăng kal kí, tơniăn tung pơlê pơla kong pơlê, rak vế hnoăng pơkuâ tơkăng kong chuăn rơlốu.

Pôa Lương Cường, Kăn xiâm hnê ngăn tơnêi têa pơkâ thế khu lêng kring vế mâu tíu pêi cheăng ki pro đông a pơlê kong kơdrâm Phú Quốc đi đo mơdêk hiâm mơno hbrâ kơchăng, hlê nhên mâu ngế, khu tơrŭm, tuăn tơmiât ôh tá tro dêi mâu khu ‘mêi; hbrâ rơnáu ‘nâi nhên tơdroăng, rĕng châ hlo ƀă teăm pơkâ tơleăng mâu tơdroăng ki trâm, pôi tá ăm kơdrâ tung mâu tơdroăng.