A Tơdroăng mê, Phŏ Kăn hnê ngăn Kuô̆k hô̆i sôk ro drêng châ ‘nâi Têt hơnăm nếo Ất Tỵ 2025, tơdrêng ƀă ăm liăn khế, liăn Têt, tơniăn tơdroăng cheăng ăm kŏng nhân ki pêi cheăng, kong pơlê Kon Tum xing xoăng ăm 2.700 kơxu tơmeăm gum mơngế pêi cheăng ki kơtiê ƀă tâi tâng kơxô̆ liăn kơnâ 1 rơtal  350 rơtuh liăn.

Phŏ Kăn xiâm hnê ngăn Kuô̆k hô̆i tối, Đảng, Tơnêi têa, Kuô̆k hô̆i đi đo ‘măn ăm tơmâng tŏng gum tơdroăng rêh ối kuăn pơlê mơngế ki pêi cheăng. A Tơdroăng “Têt tơkŭm dêi rơpó - Hơngui mơnê Đảng”, Phŏ Kăn xiâm hnê ngăn Kuô̆k hô̆i Trần Quang Phương pơtối hbru tơmeăm ăm 50 ngế kŏng nhân mơngế pêi cheăng a kong pơlê Kon Tum ki kơtiê xơpá ó.