Pêi pro tơdroăng cheăng troh leh tơbâ 100 hơnăm hâi Mơjiâng Đảng Kŏng san Việt Nam hâi lơ (3/2/1930-3/2/2030), kơxo hâi lơ 15/1, a Hà Nội Ƀơrô Tíu xiâm Đảng tơkŭm po leh pơxiâm dêi tơdroăng Tơkêa bro ‘mâi  pro, mơdêk nếo ƀă mơjiâng pro nếo Kơpong Hngêi ăm tơmối ối pơtê Hồ Tây, Kố cho rôh apoăng vâ pơtối pêi mâu tơdroăng tơkêa bro Mơjiâng bro Tíu ‘măn rak tơmeăm Đảng Kŏng san Việt Nam ƀă Đề án Pơ’lêh kơxô̆ tung mâu kơ koan Đảng.

A leh pơxiâm pro, pôa Tô Lâm, Kăn xiâm pơkuâ hnê cheăng Đảng ƀă mâu kăn xiâm Đảng, Tơnêi têa ƀă Pơlê kong kân Hà Nội hiăng tiê nút ki tối thế mơjiâng pro tơdroăng Tơkêa bro. Tơdroăng Tơkêa bro ‘Mâi rơnêu pro  ƀă pro nếo Kơpong hngêi ăm tơmối ối pơtê Hồ Tây châ pơxiâm po, klêi hiăng pro kêi ah kô chiâng tíu tơkŭm po leh kân ‘na tơdroăng kal kí, tíu ki hôp tung tơnêi têa ƀă kong têa ê, mâu tơdroăng cheăng pêi ki kal dêi Đảng, Tơnêi têa; Tơkŭm po hôp tâi tâng tung lâp tơnêi têa dêi Đảng; tơkŭm tơdah mâu khu tơmối kong têa ê ki kân troh pôu pêi cheăng ƀă tơkŭm po mâu tơdroăng hơdruê xuăng ki tơviah drêng troh tơbâ hâi leh kân dêi tơnêi têa.

Kố cho tơmeăm khoăng ai pơxúa kal kí kân pêi pro troh hneăng hôp Đảng tung lâp tơnêi têa rôh má 14, veăng ‘no hnoăng mơnhông cheăng kâ, rêh ối pơlê pơla dêi pơlê kong xiâm rơpâu hơnăm rơkê plĕng, thăm mơhno um méa ki lĕm tro dêi Việt Nam ăm mâu vâi pú hmâ tung lâp plâi tơnêi ‘nâi.