Hbrâ rơnáu tơdroăng ki vâ roê mâu kế tơmeăm xúa tung rôh Têt, Kŏng ti Tơlo liăn Bánh mứt kẹo Hà Nội (Hanobaco) hiăng hbrâ tŭm mâu tơmeăm têt hơnăm 2025 sap ing tơdế hơnăm nah. Tiah mê, mâu tơmeăm, kế kâ môi tiah kía hăng, kơƀăn kĕo ƀă hên ki ê tâk 10%, ƀă vâ chê 350 tâ̆n kía hăng, 100 tâ̆n kơƀăn kĕo. Rơtế prôk ƀă mơngế ki roê xúa, tíu pêi cheăng mơ’no tối hên kế tơmeăm vâ tê tung rôh Têt ƀă kế tơmeăm ki dâi lĕm ƀă yă tê tơtro, mâu túa pro hên.

Pôa Lê Ngọc Huy, ngế ki xiâm pơkuâ ƀơrô cheăng kâ, Kŏng ti Tơlo liăn Bánh mứt kẹo Hà Nội ăm ‘nâi, tung pơla mơjiâng pro, kŏng ti đi đo pêi pro kơtăng mâu tơdroăng pơkâ thế ‘na krúa lĕm tơniăn kế kâ vâ djâ tơmeăm ki dâi lĕm má môi ăm mâu ngế ki roê kâ. Rơtế amê, tơmeăm tê tung rôh têt châ khu mơdró kâ tơtrŏng ‘na ki kơhiâm krê dêi mâu kơpong:

“Ngin ai mâu kế tơmeăm ki châ pro tiô chal nếo nôkố lơ tơrŭm môi tiah dêi pái kơpong. Mê cho mâu kơhôp kía hăng ki ngin pro mâu tơmeăm tá 3 kơpong Bắc – Trung – Nam tŭm túa kía hăng ai 12 tơdrong; pakĭng mâu tơdrong ki tiah hmâ môi tiah: pôm pré, kía, pôm ka rốt ƀă hên ki ê mê ai tơ’nôm tá mâu tơdrong ki ê môi tiah yâu tằm, tơdrong mãng cầu, mit, sầu riêng ƀă hên ki ê. Tiah mê púi vâ djâ hên túa tơmeăm ăm mâu ngế ki kâ, xuân môi tiah ‘na ki hên hĭn dêi mâu kế tơmeăm vâ ngế ki roê kâ chiâng vâ rah xo”.

Dế nôkố, hên khu mơdró kâ tung kơvâ kế kâ xuân hiăng hbrâ rơnáu tŭm mâu kế tơmeăm vâ tê, mâu kế tơmeăm ki vâ roê xúa tung rôh Têt dêi kuăn pơlê. Pôa Trương Mạnh Linh, Kăn pơkuâ kơvâ phái dêi Grup pơkuâ Tân Long ăm ‘nâi, dế nôkố hiăng pêng păm mâu đơn roê tơmeăm tung hneăng má 1/2025. Pakĭng mê, tê tơmeăm ngi kong têa ê, khu mơdró kâ hiăng hbrâ ‘măn hên phái vâ tê tung rôh Têt Lo hơnăm nếo, ƀă phái xuân ối tâk tơ’mô tiô rêm hơnăm ƀă hiăng ai túa pơkâ vâ ‘măn kơdĭng rak vế dâi lĕm má môi tê ăm mâu ngế ki xúa tơdah têt Ất Tỵ 2025:

“Ngin đi đo ‘măn kơdĭng mâu kế kâ vâ rak vế tơniăn tŭm mâu tơmeăm ăm tơdroăng ki vâ roê dêi mâu kuăn pơlê tung tơnêi têa, ƀă túa ki um ƀă ‘măn kơdĭng phái tung tíu ki rak vế, vâ tơniăn ki dâi lĕm dêi phái ối rak vế ki dâi lĕm ton má môi ăm kơchơ tê mơdró tung tơnêi têa, rak tơniăn tê ăm kuăn pơlê tung rôh Têt”.

Vâ rak vế tơniăn tê tro má môi rơnó roê tơmeăm kân má môi tung hơnăm, mâu tíu pêi cheăng tê kế kâ ki kal xuân hiăng pêi pro klêi mâu túa pơkâ mơjiâng pro kế tơmeăm. Mâu tíu pêi cheăng tê tơmeăm xúa ki kal hbrâ rơnáu tơdjêp, tí tăng tơmeăm pêi lo ing chiâk deăng, kế kâ, mâu kế tơmeăm ki kơhiâm lĕm tiô khôi hmâ dêi mâu kong pơlê, hên hĭn kế tơmeăm ki kơjo gum má môi cho kế tơmeăm Việt Nam mơjiâng pro tê ăm kơchơ tê mơdró tung rôh mơ’nui hơnăm, hdrối, tung ƀă klêi kơ’nâi Têt Lo hơnăm nếo.

Pôa Trương Sỹ Bá, Kăn hnê ngăn Hô̆i đong kuăn trĭ Kŏng ti tơlo liăn Nông nghiệp BAF Việt Nam ăm ‘nâi, ƀă mâu kế tơmeăm cho hơ’nêh chu khu mơdró kâ ai hbrâ rơnáu nhên, mơdêk tơ’nôm mâu chu păn vâ ai hơ’nêh chu tê tung rôh Têt Lo hơnăm nếo 2025.

''Têt hơnăm kố ngin chiâng vâ ăm kơchơ tê mơdró 1,1 troh 1,2 rơtuh pŭm chu, ƀă hơ’nêm gá tâk péa xôh. Rơtế ƀă tơdroăng ki păn tơ’nôm kuăn chu dêi khu mơdró kâ rơtế ƀă mâu kŏng ti păn ki ê, kô veăng gum mơdêk tơdroăng ki tê chu ăm kơchơ tê mơdró ƀă hên ki ê. Ing mê, kô pêi pro châ tơdroăng púi vâ roê kâ dêi kuăn pơlê”.

Tiô jâ Nguyễn Kiều Oanh, kăn phŏ ngăn cheăng kơmăi kơmok ƀă tê mơdró Hà Nội, rôh têt kố pơlê kong kân hiăng ai tơdroăng ki hbrâ rơnáu tŭm mâu tơmeăm tê ăm kơchơ, xuân môi tiah mâu kế tơmeăm ki dâi lĕm tê ăm kuăn pơlê a pơlê kong kân sap ing hdrối Têt Lo hơnăm nếo 3 khế. Rơtế amê, tơkŭm po hên tíu tê tơmeăm tơniăn tŭm tơmeăm, yă tê tơniăn; tơkŭm po tơbleăng mâu tơdroăng ki roê tơmeăm hlối ăm tơ’nôm tơmeăm vâ mơhnhôk mâu ngế ki roê, vâ pôi tá ôh tá ai tơmeăm, ah chiâng pro yă tê to kơnâ:

“Ngin xuân hiăng pêi cheăng ƀă mâu tíu ki tê kế tơmeăm xuân môi tiah mâu rơpŏng ki tê mơdró ‘ngré, mâu kơchơ tê mơdró vâ ‘nâi nhên tơdroăng púi vâ xuân môi tiah mâu kế tơmeăm vâ tê châ tiô tơdroăng púi vâ dêi kuăn pơlê ki roê tung rôh Têt hơnăm kố. Ngin xuân tối rơdêi kô pêi pro tro hnoăng cheăng dêi tơná vâ ai tŭm tơmeăm tê tung kơchơ tê mơdró Hà Nội pơrá rak tơniăn ki dâi lĕm”.

 Vâ rak vế tơniăn tŭm tơmeăm ki kal xúa, yă tê tơniăn tung kơchơ tê mơdró tơmeăm rôh Têt Lo hơnăm nếo Ất Tỵ hơnăm 2025; Khu xiâm ngăn kơmăi kơmok ƀă tê mơdró pơkâ thế mâu khu ngăn kơmăi kơmok ƀă tê mơdró mâu kong pơlê, pơlê kong kân ối tung Tơnêi têa séa ngăn nhên tơdroăng ki pơhlêh dêi kơchơ tê mơdró, tơmeăm tê tơdroăng ki roê xúa mâu tơmeăm ki kal, hbrâ rơnáu ai túa pơkâ mơ’no ăm mâu kơ koan ki ai tơdjâk troh troăng hơlâ rak tơniăn tŭm tơniăn tung kơchơ mơdró, pôi tá ăm ai tơdroăng ki ôh tá bê tơmeăm tê, tơmeăm hiăng tâi tơkôm ah pro mơdêk yă tung rôh mơ’nui hơnăm ƀă Têt Lo hơnăm nếo.

Rơtế amê, hlối hbrâ mâu tơmeăm, ‘măn kơdĭng tơmeăm xúa ki kal rôh Têt; tơbleăng mâu troăng hơlâ pro tơniăn tung kơchơ mơdró tiô pơkâ dêi luât. Tơdrêng amê hlối mơdêk rơdêi tơbleăng mâu tơdroăng cheăng pêi pro Rôh mơhnhôk “Mơngế Việt Nam roê xúa tơmeăm Việt Nam pro”, Tơdroăng ăm tơmeăm Việt Nam troh a thôn pơlê, troh a kơpong tíu pêi cheăng tơrŭm ƀă mâu tơdroăng ki po kơchơ, kơdroh yă, mơhnhôk tơdroăng ki roê xúa.

Mơdêk tơdroăng ki séa ngăn kơchơ mơdró, tơtrŏng séa ngăn ‘na yă, ki dâi lĕm dêi mâu tơmeăm khoăng, mâu pơkâ ‘na tơniăn krúa kế kâ, mâu tơdroăng ki xiâm ‘na gô̆m tơmeăm, mơdêk yă tê ôh tá tro.