Khu ngăn ‘na cheăng tơrŭm Ea Tân, tơring Krông Năng, kong pơlê Dak Lak ai 220 rơpŏng ki tơrŭm pêi pêt kơphế tung tâi tâng tơnêi tíu ai lối 330 ha. Pôa Nguyễn Trí Thắng, Kăn ngăn Khu pêi cheăng tơrŭm tối ăm ‘nâi, vâ thăm mơdêk ki kơnâ dêi tơmeăm pêi pêt mơjiâng mê athế tơrŭm tung pêi chiâk pêi deăng tro tiô túa cheăng ki kân hơngế vâ kơdroh tơdroăng ki mơ’no liăn rôe ‘mot tơmeăm ing kong têa ê, ing mê, athế thăm mơjiâng, pêi lo kế tơmeăm ki dâi lĕm khât vâ mâu kơchâi plâi pôm mê châ tơtro tiô tơdroăng pơkâ thế, tơdroăng ki mơnhên dêi lâp plâi tơnêi:

“Yă rôe tơmeăm mê Khu ngăn ‘na cheăng tơrŭm hiăng rôe kơnâ tâ tâng vâ pơchông ngăn ƀă ki kơnâ dêi a kơchơ, khu ngăn ‘na pêi cheăng tơrŭm ối tŏng gum mâu ngế ki ngăn ‘na kih thuât uâ mơdiê, ƀă khu ngăn ‘na pêi cheăng tơrŭm vêh rôe kơphế ki dâi lĕm. Klêi kơ’nâi 4 troh 5 hơnăm mê hên ngế tung khu pơkuâ cheăng hiăng vêh mơnhông túa pêi cheăng kâ gum mơdêk dêi rơpŏng hngêi, ki kal má môi mê cho túa pêi cheăng kâ krá tơniăn”.

Thăm mơdêk tơrŭm tung pêi chiâk pêi deăng, rôe xo tơmeăm ki pêi mơjiâng, ing mê, tơrŭm pêi ing tơdroăng mơdâ pêt, rak ngăn, krí xo, chôu ‘măn ta troh a mơ’no tê kế kâ, kơchâi plâi kâ ki tơniăn, mê cho túa cheăng ki Kŏng ti pêi cheăng tiô rơnó môi tung khu tê rôe tơmeăm ƀă kong têa ê lơ 2 khế 9 Dak Lak, dó inâi Simexco Daklak dế mơjiâng khu pú tơrŭm cheăng ki ƀlêi chiâng a kơchơ mơdró kâ. Veăng tung khu ki tơrŭm cheăng mê, kuăn pơlê châ khu mơdró kâ mơ’no liăn rôe gum ‘na hdrê, phon rơvât, pơkeăng vâ kuăn pơlê hmiân tuăn mơdâ pêt ƀă tê rôe tơmeăm pêi lo châ tơniăn lĕm.

Pôa Lê Đức Huy-Kăn xiâm pơkuâ ngăn Simexco Daklak tối ăm ‘nâi, kơnôm ai tơdroăng tơrŭm cheăng, mê khu mơdró kâ xuân hiăng hbrâ tơnáu mâu tơmeăm khoăng ki pêi lo châ dâi lĕm khât:

“Hnoăng cheăng ki pôu râng ƀă tuăn mơno ki hlê plĕng dêi kuăn pơlê ƀă mâu ngế ki pêi chiâk pêi deăng hiăng chiâng khu ki tơrŭm cheăng. Kuăn pơlê ki pêi chiâk deăng hiăng chiâng mâu khu mơdró kâ ‘na tơmeăm pêi lo ing chiâk deăng. Drêng hiăng hlê plĕng tiah mê, kuăn pơlê pêi chiâk deăng pêi pro dêi hnoăng cheăng lĕm tro păng ‘nâng. Mê cho ki xiâm krá tơniăn vâ mâu kŏng ti thăm mơ’no dêi tơmeăm pêi lo ing chiâk deăng tơná lo troh a lâp plâi tơnêi”.

Lâp kong pơlê Dak Lak dế nôkố ai lối 470 khu pêi cheăng tơrŭm tung kơvâ cheăng chiâk deăng, tung mê, ai dâng 150 khu pêi cheăng tơrŭm ing pơxiâm mơdâ pêt, po văng nhâ, rak ngăn, krí xo, chôu ‘măn ƀă mơ’no tê mơdró kế tơmeăm. Pôa Hùynh Bài - Kăn hnê ngăn Khu ngăn ‘na pêi cheăng tơrŭm kong pơlê Dak Lak tối ăm ‘nâi: ki hên mâu khu ki tơrŭm cheăng dế tơkŭm a mâu tơmeăm ki xiâm, môi tiah kơphế, tiu, báu phái, mâu plâi kâ ƀă hên mâu tơmeăm khoăng ki ê. Tơdroăng ki tơrŭm cheăng mê hiăng chôa ‘lâng vêh mơnhông rế a’ngêi tâ túa ki pêi cheăng kâ tơprâ tơprŭng, utâi utá, iâ êt, gum mơnhông pêi chiâk deăng tro tiô túa ki tơkŭm pang ‘nâng, pêi lo mâu tơmeăm khoăng tơxâng ăm hngêi kơchơ kal vâ rôe.

“Chôa ‘lâng châ tơrŭm ƀă khu ki pêi cheăng kố vâ ing mê, hnê tơdjâ ăm khu ngăn ‘na pêi cheăng tơrŭm rơtế ƀă mâu rơpŏng kuăn pơlê tơrŭm ƀă mâu khu mơdró pêi cheăng kâ krá tơniăn hên tâ vâ kring vế tơniăn ăm hnoăng cheăng chiâk deăng ƀă tơdroăng ki mơjiâng lo tơmeăm ki dâi lĕm khât”.

Tiô pôa Nguyễn Hoài Dương, Kăn ngăn ‘na Chiâk deăng ƀă Mơnhông thôn pơlê dêi kong pơlê Dak Lak tối, tung pơla yă tê tơmeăm chiâk deăng pơhlêh tâk chu đi đo, mê tơdroăng ki tơrŭm ‘na pêi chiâk pêi deăng hiăng chiâng hnoăng cheăng ki kal kân. Kơvâ ngăn ‘na chiâk deăng dế krếo thế mơ’no liăn mơjiâng mâu túa ing mơdâ pêt, po văng nhâ, rak ngăn, krí xo, chôu ‘măn djâ tê mơdró, ki malối ƀă mâu hdrê loăng pêt ki xiâm dêi kong pơlê.

“Mơnhông pêt mâu hdrê loăng plâi ki tơkŭm, pơtối mơdêk ivá cheăng ki xiâm dêi tơrêm kơpong vâ thăm mơdêk rĕng tung pêi pêt tiô túa ki tơrŭm cheăng, tơ’mot hên khu mơdró kâ mơ’no liăn cheăng a mâu kơpong ki pêt mơjiâng tơmeăm vâ tơ’lêi ăm tơdroăng ki tê rôe tơmeăm, thăm mơdêk túa uâ mơdiê, mơjiâng tơmeăm kâ, tơmeăm xúa thăm rế kơnâ ƀă hnối rôe mâu tơmeăm ki mê ăm tơná kuăn pơlê”.

Ƀă tơdroăng ki vâ môi tuăn dêi kuăn pơlê, khu ngăn ‘na cheăng tơrŭm, khu mơdró kâ, khu pơkuâ ngăn, hên túa tơrŭm cheăng chiâk deăng a Dak Lak dế châ mơnhông tơtêk hên ó. Kố ôh ta xê to rơkong ki vâ tiâ mơnhên tơdroăng vâ rak tơniăn tê rôe tơmeăm pêi lo ing chiâk deăng mê ối cho tíu ki vâ khoh kâi châ mơdêk ki kơnâ ‘na yă dêi tơmeăm khoăng. Hnoăng ki tơrŭm pêi cheăng pơla kuăn pơlê, khu ngăn ‘na cheăng tơrŭm ƀă khu mơdró kâ ti xê to vâ mơnhông tơxâng ƀă hnoăng cheăng mê ối cho túa cheăng ki vâ khoh kâi châ tơkâ luâ ki pá puât, prôk troh a túa pêi chiâk deăng krá tơniăn.