Tối nhên troh troăng tơmiât dêi ôm hyô nôkố cho mơnhông ngiât ƀă krá ton, mê tơdjêp ‘na tơdroăng logistics troăng tơƀai – ôm hyô – tíu troh kal tăng pro cho mâu tơdroăng ki ai ivá mơnhông, cho tơdroăng ki xiâm ƀă ki kal má môi cho athế pro ai mâu tơmeăm ôm hyôh krê, pro pơxúa tơƀrê vâ tơmối kong têa ê hâk vâ ƀă troh a Việt Nam. Tiah mê ôm hyô Việt Nam pêi tiô túa ki lâi vâ châ mâu tơdroăng ƀriê mê dêi tơmối? Kố cho túa ki pơkâ kơ-êng ƀă kal ai tơdroăng cheăng tung la ngiâ pêi pro nếo púi vâ tơ’mot tơmối kong têa ê troh Việt Nam rế hía rế hên tâ dêi Tiê̆n sih Võ Trí Thành, Viê̆n trưởng Viê̆n Hriăn ngăn tơdroăng cheăng tung la ngiâ inâi ƀă tơbriât:

"Ôm hyô Việt Nam ƀă mâu tơdroăng ki tí tăng vâ mơnhông ôm hyô, mê cho mơnúa ngăn, tăng ‘nâi, pơxúa, veăng gum pơlê pơla. Xua mê, tơdroăng pơkâ mơ’no cho ôm hyô Việt Nam kal pêi môi tiah lâi, pêi pro tiah lâi vâ pro ai mâu tơdroăng mơnhông ‘na ƀriê hiâm mơno dêi tơmối, vâ mơnhông krá tơniăn ton. Mê cho tơdroăng mơnhông ‘na tuăn mơno ki ôm hyô pro pơxúa ăm, ối tung tơdroăng ki tơrŭm tro ƀă rơkê tung tơdroăng ôm hyô”.

Môi tuăn ƀă túa tơmiât kố, pôa Vũ Quốc Trí, Ngế chêh tơm xo rơkong khu tơrŭm Ôm hyô Việt Nam, tối túa pêi ing tơdroăng pơkâ dêi ôm hyô Việt Nam cho Timeless Charm (Ki lĕm ôh tá ôh tá chiâng tâi)

"Túa pêi cho athế rơkê môi tiah túa pêi kong têa ê. Tơdroăng pơkâ xuân mơni kô ối rak (Việt Nam ki lĕm ôh tá kâi hía), la túa ki mơhno athế hơniâp ro tâ. Á tối tiah kố, tơdroăng ki kal inâi mơjiâng cho tơ’mot tơmối kong têa ê mot, xua mê pôi tá lôi nâl Xuăn. Túa tơmiât dêi ngin cho ki lĕm dêi Việt Nam gá lĕm tung sap rôh nah, nôkố ƀă tung la ngiâ. Gá cho ki lĕm tơkâ luâ hâi khế. Ôh ti xê tiô kơxô̆ mê cho tiô ki lĕm u ối đi đo”.

Ƀă pôa Nguyễn Ngọc Bích – Kăn hnê ngăn Rutic Hospitality Group, kăn pơkuâ pơhlêh nếo tơdroăng tơkêa ôm hyô Swis xua tơdroăng mơnhông krá tơniăn tối tiah kố, ki rơkê plĕng klêi kơ’nâi hên hơnăm pêi ôm hyô ăm hlo, púi vâ mơjiâng pro ôm hyô mê mâu khu mơdró kâ kal ai tơdroăng ki tơrŭm krá tơniăn, “Rơtế ƀă dêi rơpó prôk hngế tâ” teăng ăm “ngế ki lâi ngế ki mê pêi” môi tiah nôkố:

"Á veăng tơrŭm tung khu ki rơkê plĕng mơjiâng pro ôm hyô ngiât dêi Mekong-startup, mê á hlo pin hiăng ai hên troăng hơlâ la xuân ối bu cho mâu troăng hơlâ ing mâu khu mơdró kâ. Tơdroăng cho pro tiah lâi pin tơrŭm mâu troăng hơlâ mê, pro chiâng troăng hơlâ ăm pơlê pơla mơnhông ngiât, pri chiâng túa ôm hyô ngiât, ƀă mơnhông mơdêk ngiât dêi Việt Nam”.

Tối nhên ‘na hnoăng cheăng dêi khu mơdró kâ tung tơdroăng tê mơdró logistics, pôa Lê Tuấn Anh, Trưởng khoa Quản trĭ du lịch ƀă Ngôn ngữ lâp plâi tơnêi, Hngêi trung Đăi hok Văn hoá Hà Nội, tối tiah kố:

“Tơmối kong têa ê troh Việt Nam lối 80% cho ƀă troăng tơƀai. Xua mê, tơdroăng ôm hyô hmâ ƀă troăng tơƀai kal ai tơrŭm krá ƀă mơnhông. Tơdroăng tơrŭm pơla rêm pâ kal khât. Troăng tơƀai xuân cho kơvâ mơđah tơbleăng ki kal, xua tơmối troh Việt Nam vâi kơto tơƀai hên tâ. Xua mê, tung tơdroăng ki khât, tơdrá, um méa dêi Việt Nam pơxiâm sap ing tơdroăng tơƀai, mê tơdroăng tơƀai cho tíu ki pơxiâm, mơgêi ƀă vêh nếo kal châ tơtrŏng”.

Tung pơla hên kong têa tơbriât rơdêi vâ tơ’mot tơmối ôm hyô kong têa ê, mê tơdroăng Việt Nam kơhnâ tơbleăng pro kơvâ tơƀai ƀă ôm hyô ai pơkâ tung tơdroăng cheăng la ngiâ ƀă tiô troăng pơkâ lâp plâi tơnêi. Tơdroăng thăm mơdêk ngăn nhên inâi ôm hyô Việt Nam tung mâu kong têa lâp plâi tơnêi, tí tăng ki pơxúa ‘na troăng tơƀai, ƀă troăng ngăn Việt Nam chiâng tíu xiâm logistics ai hên tơdroăng ki hlâu drêng tơraih tơƀai Long Thành pro klêi a hơnăm 2025, mâu khu mơdró kâ dêi Việt Nam ‘nâi rơtế ƀă dêi rơpó tơrŭm vâ mơnhông ôm hyô ngiât – ƀă mâu tíu troh tơniăn, hmâ a chê, pro chiâng ivá ƀriê tung hiâm mơno ăm tơmối kong têa ê drêng troh Việt Nam ƀă rơhêng vâ vêh troh Việt Nam nếo.