Kố cho rôh má 3 ki pơtối kăn xiâm hnê ngăn Vi ƀan kuăn pơlê kong pơlê Dak Nông hôp tơpui ƀă kuăn pơlê. Lối 130 tơdroăng kơ-êng pâ thế hiăng châ pơtroh ăm hneăng hôp. Mâu tơdroăng pá, tơvâ tơvân tung pêi chiâk, kuăn pơlê, thôn pơlê; luât pơkâ ‘na ƀaoh hiêm pêi chiâk; pêt loăng plâi tơtro ƀă hyôh kong prâi; mâu tơdroăng pâ thế, veăng hnê tối ‘na tơdroăng pơtối ‘mâi mơnhông kơvâ chiâk deăng hiăng pơtroh ăm Kăn xiâm hnê ngăn Vi ƀan kuăn pơlê kong pơlê Dak Nông.

Ing tơdroăng hnê tối dêi kuăn pơlê, khu pêi cheăng tơrŭm , pôa Hồ Văn Mười - Kăn xiâm hnê ngăn Vi ƀan kuăn pơlê kong pơlê Dak Nông  hiăng hnê mơhno ăm mâu tíu pêi cheăng kơvâ cheăng, mâu cheăm tơring tơkŭm tăng troăng tah xơpá, tơvâ tơvân vâ kuăn pơlê hmiân tuăn pêi cheăng kâ. Pôa Hồ Văn Mười xuân mơhnhôk kuăn pơlê mơ-eăm tâ nếo tung pêi cheăng, malối mơjiâng khu tơrŭm cheăng. Mâu tôh pêi cheăng, khu pêi cheăng tơrŭm vâ tơkŭm ivá rơdêi, mơnhông cheăng kâ kong pơlê.