Maluâ hiăng hmâ pêt reăng mai mơngiơk trĭng hiăng châ chât hơnăm kố, la ngoh Lê Niê Minh Quân, ối a cheăm Čư̆ Ebuôr, pơlê kong kơdrâm Ƀuôn Ma Thuột, kong pơlê Dak Lak xuân ối tô tuăn ó khât ăm rơnó reăng hơnăm kố xua ga hyôh kong prâi kăng hngíu ƀă ai kong khía hên ó. Vâ mơdât mâu tơdroăng ki tro tơ’nhiê, oâ hdrong kâ ăm reăng mai, ngoh Quân hiăng mơdoh hên chôu phut vâ rak ngăn, ‘mâi rơnêu dêi túa ki rak ngăn reăng vâ khoh chiâng ai reăng mai ki tơpo lĕm má môi. Ngoh Quân tối ăm ‘nâi:

“Dế nôkố, dế tro rơnó ki rak ngăn ƀă po văng dêi nhâ ăm kơdrum reăng vâ la ngiâ kố ai reăng tơpo lĕm má môi vâ hên ngế rơhêng vâ troh rôe hên tâ”.

Xuân môi tiah ƀă reăng mai, đào, cúc đại đoá xuân châ hên rơpŏng hngêi a Dak Lak rah xo vâ tơbleăng a hâi Têt. Mâu tơ’lo reăng cúc đại đoá kân dâng 1m2 troh 1m5 hiăng hmŏng chiâng kông kân, lo reăng klâi kơ’nâi 5 khế mơdâ pêt nah. Chôu phut kố châ ngăn cho roh ki kal má môi vâ ‘nâi nhên reăng dâi lĕm lơ ôh, yă ga kơnâ lơ ôh. Xua ti mê, mâu rơpŏng ki pêt reăng cúc đại đoá gum ăm hâi Têt môi tiah ngoh Nguyễn Thanh Hùng, cheăm Čư Êbuôr, pơlê kong kơdrâm Ƀuôn Ma Thuột, kong pơlê Dak Lak athế rak ngăn dêi krâu khât tâ. Rêm kơtâ hlá ki răng rêa, tơrêm reăng pơxiâm tơpo ki ôh tá dâi ngoh hiăng hnêi tah lôi pơtâi pơtâng, vâ trếo ki lĕm ing tơ’lo tơnêi ki chĕm ‘drêh ăm mâu reăng ki kân ki lĕm tâ. Ngoh Nguyễn Thanh Hùng ai tối tiah kố:

“Tung pơla kố, cho pơla ki mơ’nui mê mâu ngế ki pêi kơdrum deăng pêi krâu, rơhí rơhó. Pin rak ngăn xiâm, kông, tơkâng reăng pro ti lâi vâ hlá, hveăng, ki tơpeâng ga i lĕm, reăng athế krúa ôh ta ai oâ hdrong, vâ ai reăng ki lĕm má môi châ tê troh mơngế ki rôe. Mơngế ki rôe xúa mê kô ai môi rơnó têt ki ai mơngiơk hên”.

A pơlê reăng Khánh Xuân, bêng Khánh Xuân, pơlê kong kơdrâm Ƀuôn Ma Thuột, kong pơlê Dak Lak, ing apoăng khế 9 troh khế 10 âm lĭt, mâu ngế pêi kơdrum deăng hiăng mơdâ pêt hên hdrê reăng ki iâ hâi, ai hên mơngiơk: cúc mâm xôi, cúc vạn thọ, phong lữ thảo,... vâ teăm tê mơ’no troh a kơchơ tung pơla troh Têt Lo hơnăm nếo. Jâ Phạm Thị Kiều Diễm, ngế ngăn kơdrum deăng reăng Hà Mi, bêng Khánh Xuân tối ăm ‘nâi, hơnăm kố, jâ mơdâ pêt hdrê 2.000 tơ’lo reăng cúc mâm xôi. Maluâ hyôh kong prâi akố hmâ tro khía hngíu hên, la ƀă tơdroăng ki hiăng rơkê dêi tơná, troh nôkố, mâu tơ’lo reăng mê xuân ối chiâng dâi lĕm, kô ai tŭm mâu hdrê reăng vâ tê a hâi têt. Jâ Diễm pói tơngah a mâu hâi achê Têt Lo hơnăm nếo kố ah, kơchơ kô pơtối châ ai hên ngế rơhêng vâ rôe, ing mê kô gum ăm mơngế pêt reăng tơngah pêi lo châ liăn chía hên.

“Á pêt xuân môi tiah rêm hơnăm, ôh tá xê pêt hên lơ iâ tâ. Tê mơ’no a hngêi kơchơ yă xuân tơniăn trối rêm hơnăm. Tâng vâ tối tơdjuôm, kơxô̆ mơngế lăm troh rôe xuân hên. Vâi nhŏng o, tơmối xuân lo lăm ngăn kơdrâm, klêi mê, vâi tăng rah hnối rôe. Á xuân rơhêng vâ tơmối, nhŏng o troh kơdrâm akố vâ rôe reăng ngin, ngin xuân châ tê dêi reăng hên há”.

Maluâ ối trâm hên xahpá xua hyôh kong prâi ôh tá tơniăn, laga, mâu ngế ki pơkuâ ngăn kơdrum deăng reăng a Dak Lak xuân hiăng kơhnâ khât ƀă loi tơngah dêi tơdroăng pêi cheăng kâ. Kơnôm ing kơpeăng kŏng ki rơkê kơhnâ dêi ngế ki pêt reăng mê kô gum mơjiâng chiâng mâu reăng ki dâi lĕm má môi, mơngiơk tơ-eăng lĕm má môi, thăm pro ăm tơdroăng ki lĕm tro ăm rêm rơpŏng hngêi phiu niu, ro rih a rơnó Têt troh, hyôh Hơngui vêh.