Hdrối vâ troh Têt Lo hơnăm nếo Ất Tỵ 2025 ƀă koh tơbâ 95 hơnăm hâi mơjiâng Đảng Kŏng san Việt Nam hâi lơ (3/2/1930-3/2/2025), kơxê hâi lơ 14/1, pôa Lương Cường, Kăn xiâm hnê ngăn tơnêi têa ƀă khu kăn lăm pêi cheăng dêi Tíu xiâm tơnêi têa hiăng lăm pôu ƀă hlối rơkâu Têt ăm pôa Trương Tấn Sang ƀă pôa Phạm Minh Triết, cho mâu kăn xiâm hnê ngăn tơnêi têa hneăng hdrối. Pôa Lương Cường, Kăn xiâm hnê ngăn Tơnêi têa tối nhoăm mâu hnoăng veăng ‘no dêi péa Kăn xiâm hnê ngăn tơnêi têa hneăng hdrối ƀă tơdroăng pêi cheăng kăch măng dêi Đảng, mơdêk ki rơdêi, nhoăm dêi tơnêi têa ƀă ‘mâi mơnhông ki tơrŭm môi tuăn hdroâng mơngế.

Drêng hơnăm nếo Ất Tỵ 2025 hiăng vâ chê troh, Kăn xiâm hnê ngăn tơnêi têa hiăng diâp tơmeăm Têt ăm pôa Trương Tấn Sang ƀă pôa Nguyễn Minh Triết prế Kăn xiâm hnê ngăn tơnêi têa hneăng hdrối, rơkâu ivá prếi ƀă rêm ngế tung on veăng, rơpŏng hngêi tung hơnăm nếo mo lĕm châ, rêh ối lĕm ro, pêi cheăng tơƀrê, tơdah rơnó Hơngui Ất Tỵ sôk ro, tơtô.

Pôa Nguyễn Minh Triết prế pôa Trương Tấn Sang rơrêk tung hiâm mơno hlo tơdroăng tuăn pâ tơmâng khât dêi Đảng, Tơnêi têa tối tơdjuôm ƀă tơná pôa Lương Cường, Kăn xiâm hnê ngăn Tơnêi têa tối krê; hlối tối loi khât tiah kố tơnêi têa pin kô mơnhông a hơnăm 2025 ing hnoăng pơkuâ hnê djâ dêi Đảng, pêi hên tơdroăng tơhbrê rơdêi tâ, pro ki tơƀrê tung tơdroăng mơjiâng ƀă mơnhông tơnêi têa.