A roh hôp, pôa Nguyễn Hòa Bình, Phŏ Ngế pro xiâm hnê mơhno má môi tối nhên pa kĭng mâu tơdroăng châ tơƀrê, tơdroăng pêi pro hiăng ăm hlo tơdroăng pơhlêh pơkuâ tơnêi têa ối ai mâu tơdroăng tá hâi tro, tá hâi rơkê, khu tê mơdró, kuăn pơlê châ achê tơdroăng pêi cheăng tá hâi phuâng lĕm, tơ’lêi hlâu. Mâu tơdroăng ki ối tơvâ tơvân, tíu ki mơdât kố, kal teăm tơdrêng tah lôi vâ tơxâng pơkâ nôkố, rĕng pro phuâng ƀă xúa châ tơƀrê rêm tơdroăng ăm tơdroăng pro tơniăn, mơnhông, kum ăm chal nếo, chal kro mơdrŏng ó rơdêi, mơ-eăm dêi tơná, xông kơneăn dêi tơnêi têa.

‘Na hnoăng cheăng tung la ngiâ, pôa Nguyễn Hòa Bình pơkâ thế mâu khu tơrŭm tung khu hnê mơhno, mâu khu xiâm, kơvâ, kong pơlê tơkŭm pêi pro 11 hnoăng cheăng hiăng châ pơkâ mơ’no. Tung mê tơtrŏng pêi tiô mâu troăng hơlâ dêi Đảng, Chin phuh ‘na pơhlêh pơkuâ tơnêi têa vâ po rơdâ pêi pro ăm i lĕm, ing tơdroăng ki inhên mơngế, nhên tơdroăng cheăng, ai tơdroăng xiâm ƀă hâi khế pêi kêi đeăng.