A roh tơpui tơno, kuăn pơlê tối loi tơngah ƀă tơdroăng pơkuâ, hnê mơhno dêi khu râ kăn pơkuâ kong pơlê Lâm Đồng tung pơla kong pơlê trâm mâ ƀă hên tơdroăng pá puât, pơloăng mơnúa. Tơdrêng amê, pói vâ kong pơlê Lâm Đồng kal tơkŭm mơnhông tơmeăm ki rơdêi tung kơvâ ôm hyô ƀă pêi lo ing chiâk deăng; mơdêk pơhlêh xúa kŏng ngê̆, cheăng kâ xúa kŏng ngê̆; tơtrŏng mơ’no liăn pro hngêi trăng, troăng klông, ki má lối cho mâu tơdroăng tơkêa bro troăng kân ăm phêp rơxế kơtâu têi ki xiâm môi tiah Tân Phú - Bảo Lộc, Bảo Lộc – Liên Khương ƀă Đà Lạt – Nha Trang vâ tơ’lêi tung tơdjêp kơpong, tung kơpong, mơdêk cheăng kâ – rêh ối pơlê pơla mơnhông mơdêk.

Xông tơpui mơgêi roh hôp tơpui tơno, pôa Nguyễn Thái Học, pôu râng hnoăng Kăn hnê ngăn cheăng Đảng kong pơlê Lâm Đồng mơnhên, kăn pơkuâ kong pơlê Lâm Đồng tơmâng xo tâi tâng mâu rơkong tơpui, pâ thế, veăng gum dêi kăn teăng mâ mâu râ kuăn pơlê. Tơdrêng amê tơkêa kô tơkŭm tah lôi mâu tơdroăng pá puât, tơvâ tơvân kố vâ mơdêk Lâm Đồng mơnhông tâi tâng, krá tơniăn.