Tung tơdroăng phiu ro péa hdroâng mơngế dế hbrâ tơdah Têt tiô khôi vâi krâ nah Ất Tỵ 2025, pôa Tô Lâm, Kăn xiâm pơkuâ hnê ngăn Đảng mơnhên Việt Nam đi đo ngăn tơdroăng mơnhông tơrŭm cheăng ƀă kong têa Sinuâ cho kơjo má môi tung tâi tâng troăng prôk tơpui kâ ƀă kong têa ê tơniăn krê, pơkuâ xêh, rêm pâ, hên tơdroăng tơrŭm.

Pôa Tập Cận Bình, Kăn xiâm pơkuâ hnê ngăn Đảng, Kăn xiâm hnê ngăn kong têa Sinuâ kơjo mơnhông tơrŭm cheăng ƀă Việt Nam tung troăng hơlâ tơpui ƀă kong têa ki achê. Klăng roh kố, Péa ngế kăn xiâm pơkuâ hiăng rơtế tơbleăng pêi cheăng Hơnăm trâm mâ tơpui tơno rơkê Việt Nam – Sinuâ 2025; môi tuăn tơrŭm tơkŭm po lĕm mâu tơdroăng leh tơbâ 75 hơnăm mơjiâng tơrŭm tơpui kâ ƀă Hơnăm trâm mâ tơpui tơno rơkê Việt Nam – Sinuâ 2025; mơdêk pơtâng tối, hnê hriâm tung mâu râ kuăn pơlê, ki má lối cho rơxông ối nếo péa tơnêi têa ‘na tơrŭm nhŏng o tiô khôi vâi krâ nah lĕm tro Việt Nam – Sinuâ.

Pôa Tô Lâm pơkâ thế péa pâ hnê mơhno mâu kơvâ, mâu khu râ thăm ti tăng mâu troăng pêi cheăng, troăng pêi châ tơƀrê vâ pơkuâ ƀă tơleăng lĕm tro tâ tơdroăng ki ôh tá môi tuăn, thăm tơrŭm tơtro ƀă râ ki kal tơrŭm cheăng pơla péa pâ tiô Hiến chương Khu lâp kong têa ƀă luât lâp plâi tơnêi tung mê ai Công ước Khu lâp kong têa ‘na Luât têa kơxĭ hơnăm 1982.