Roh kố, Khu mơngế tro trếo ‘mêi da cam/dioxin Việt Nam hiăng diâp kơxô̆ liăn pêt mơjiâng tơmeăm diâp ăm 5 rơpŏng tro trếo ‘mêi da cam/dioxin ƀă 30 kơxuô tơmeăm Têt tŏng gum mâu ngế tro trếo ‘mêi. Tâi tâng ki kơnâ mâu kơxuô tơmeăm cho 86 rơtuh liăn. Troh tơdrêng a hngêi lăm kơ-êng ƀă diâp kơxuô tơmeăm Têt mâu rơpŏng a pơlê kân Pơ Drang, tơring Krông Ƀúk, kong pơlê Dak Lak, Trung tươ̆ng Nguyễn Hữu Chính, Kăn hnê ngăn Khu ngế tro trếo ‘mêi da cam/dioxin Việt Nam, hiăng mơhnhôk mâu ngế tro trếo ‘mêi ƀă rơpŏng mơ-eăm xông tơtêk tung tơdroăng rêh ối.

Nôkố kong pơlê Dak Lak ai 1.418 ngế tro trếo ‘mêi da cam/dioxin dế châ tŏng gum liăn. Tâi tâng mâu ngế tro trếo ‘mêi kố pơrá trâm pá puât tung tơdroăng rêh ối. Roh kố, Khu ngế tro trếo ‘mêi da cam/dioxin kong pơlê Dak Lak hiăng mơhnhôk diâp kơxuô tơmeăm têt troh tâi tâng 1.418 ngế tro trếo ‘mêi, rêm kơxuô kơnâ 200.000 liăn, veăng gum mâu rơpŏng ai tơ’nôm liăn vâ kâ Têt.