Ai 30 hơnăm pêi cheăng, nâ H’Er Niê Kdăm, Chuyên viên Ƀơrô ngăn Kuăn ngo tơring Čư̆ Mgar, kong pơlê Dak Lak ăm ‘nâi, nâ hlo luât pơkâ tŏng kum ăm mâu kăn ƀô̆ rĕng pơtê hdrối kơ hơnăm pơkâ tiô tơdroăng Pơkâ kơxô̆ 178 mê tro ‘nâng. Nâ H’Er loi tiah kố, mâu ngế hơnăm ối nếo  thế pơtối mơ-eăm tâ nếo tơdroăng cheăng pêi tơná ƀă nâ xuân pơtối veăng ‘no hnoăng cheăng tơná tơtro ăm kuăn pơlê a tíu nâ rêh ối.

“Klêi pơtê a kô vêh a pơlê. Tung pơla pêi cheăng a hiăng hriâm hên tơdroăng kô vêh ƀă kuăn pơlê, ki klâi kuăn pơlê ôh tá ‘nâi mê a kum, mơhno troăng ăm kuăn pơlê hnê kuăn pơlê mơnhông cheăng kâ. Tâng a châ veăng pêi tơdroăng cheăng ki ê a thôn pơlê tơná a kô mơ-eăm kum dêi pơlê”.

Tiah mê há, Kih sư Nguyễn Ngọc Giao, Pơkuâ Ƀơrô ngăn ‘na chiâk deăng ƀă Mơnhông thôn pơlê tơring Čư̆ Mgar xuân hiăng pro đơn pâ pơtê cheăng hdrối hơnăm pơkâ. Pôa Giao loi tiah kố, tơdroăng pơ’lêh nếo rah iâ tê mơngế pêi cheăng ăm tơnêi têa dế tơbleăng pêi tung tâi tâng tơdroăng kal kí kô pro pơxúa ton hơnăm ăm kuăn pơlê ƀă ki mơnhông tơƀrê krá tơniăn. Ƀă kơvâ pêi chiâk deăng, kô gum  mơnhông pêi chiâk tơƀrê hên, pro pơxúa pêi lo liăn tơniăn ăm kuăn pơlê.  

 “A púi vâ mâu rơxông pơtối, xo ah hmôi thế pơtối rak vế pêi pro hnoăng cheăng tơná ƀă hnoăng ki tơƀrê dêi rơxông hdrối hiăng  pro ti lâi vâ mơdêk tơƀrê, ivá cheăng tung pêi pro tơdroăng cheăng kal kí dêi Đảng ƀă tơnêi têa hiăng pơcháu”.

Riân troh hâi lơ 10/1, tơring Čư̆ Mgar hiăng ai 16 ngế kăn ƀô̆ chêh hlá đơn pâ pơtê cheăng hdrối hơnăm pơtê. Pôa Nguyễn Thiên, phŏ kăn hnê ngăn Đảng tơring Čư̆ Mgar, ăm ‘nâi, Khu pơkuâ cheăng dêi tơring kô séa ngăn tơrêm ngế, tơniăn hnoăng ki pơxúa tiô luât pơkâ dêi tơnêi têa. Pôa Nguyễn Thiên tối nhên:

“A tơmiât tiah kố mâu vâi pú hiăng hlo ki tro, ki pơxúa dêi tơdroăng xing xoăng rah xo iâ tê mơngế pêi cheăng. Drêng pêi tơdroăng ‘na tuăn mơno mê mâu kăn hiăng sôk ro tơpui tối, mê tung tơdroăng tơkŭm tăng rah mâu kăn ƀô̆, mâu vâi pú thế pâ xêh mê khu tơkŭm po kô pro tơ’lêi hlâu tâ ƀă drêng ai luât pơkâ kô mơ-eăm pro hlâu ăm mâu ngế ki pơtê châ xo kơxô̆ liăn tŏng gum tro tiô luât hiăng pơkâ”.

Tơdrêng ƀă Čư̆ Mgar, mâu tơring ki ê tung kong pơlê Dak Lak xuân tối ai hên ngế kăn ƀô̆ pâ pơtê cheăng hdrối hơnăm pơkâ tiô tơdroăng Pơkâ kơxô̆ 18. Hiăng ai 7 ngế kăn ƀô̆, đảng viên dêi Khu pơkuâ cheăng Đảng kong pơlê rak ngăn, tung mê ai 2 Ngế tung khu cheăng Đảng kong pơlê, 1 kăn pơkuâ hnê ngăn Đảng tơring xuân chêh hlá đơn pâ pơtê cheăng hdrối hơnăm pơkâ. Cho kăn hnê ngăn Đảng tơring ki apoăng dêi Dak Lak pâ pơtê cheăng hdrối hơnăm pơkâ drêng ối lối 6 hơnăm nếo mê nếo tro hơnăm pơtê, pôa Ra Lan Vôn Ga, Kăn pơkuâ hnê ngăn Đảng tơring M’Drăk tối:

“A tơmiât a púi vâ tiah kố, ai tíu vâ tơkŭm cheăng xuân môi tiah mâu tíu pêi cheăng tung pơla tăng ngăn tơ’mot tơkŭm cheăng ai kăn ƀô̆ hơnăm ối nếo tro tâ á, rơkê tâ á vâ pơtối pêi cheăng ƀă hlối pleăng hnoăng cheăng tơná ăm tơring ƀă ăm kong pơlê vâ rế mơnhông tâ. Drêng á pơtê, ối ai ivá ƀă tuăn ngôa tiô tơná hlê á kô tăng pêi xêh môi tơdroăng cheăng ki ê nếo tơtro ƀă tơná vâ pơtối ‘no hnoăng mơnhông tơná xuân môi tiah kuăn pơlê’’.

Pôa Nguyễn Thượng Hải, Ngế pơkuâ Khu tơrŭm ngăn cheăng Đảng kong pơlê Dak Lak ăm ‘nâi, tiô pơkâ, kong pơlê kô rah xo iâ tê mơngế pêi cheăng ki iâ 15% ngế cheăng klêi tơ’mot tơkŭm ƀă tah  20% ngế. Tơdroăng mâu kăn ƀô̆, đảng viên chêh hlá đơn pâ pơtê cheăng  hdrối hơnăm pơkâ cho tơdroăng tơxâng nhoăm, ing mê, kum kong pơlê hlâu tâ tung tơdroăng pêi tơdroăng tơkêa bro xing xoăng mơngế cheăng, kơdroh kơxô̆ mơngế cheăng ăm tơnêi têa:  

“Ai hên ngế ối kơpêng 5 hơnăm pêi cheăng xuân ối tro hơnăm vâ pơtối pêi cheăng hneăng ki pơtối, la mâu ki mê xuân tơmiât pro hlâu ăm mâu rơxông nếo vâ vâi châ mơnhông tơƀrê tâ, mơnhông dêi kong pơlê, mơnhông tíu pêi cheăng xông rơdêi tâ nếo xuân môi tiah mơnhông dêi tơnêi têa xông pơ’lêh nếo”.

Tơdroăng kăn ƀô̆ pâ pơtê cheăng hdrối hơnăm pơkâ a Dak Lak dế pro tơ’lêi ăm kong pơlê tung tơdroăng xing xoăng rah xo iâ tê ngế cheăng tung môi tíu pêi cheăng. Kố cho tơdroăng pơcháu hnoăng cheăng, gum mơdêk tơƀrê tơdroăng cheăng, pro xiâm ăm Dak Lak mơnhông tơƀrê.