Drêng troh Têt Lo hơnăm nếo Ất Tỵ 2025 la ngiâ ƀă mâu tơdroăng cheăng pêi vâ troh tơbâ 95 hơnăm hâi mơjiâng Đảng Kŏng san Việt Nam, kơxo lơ 16/1 a Nam Định,  pôa Tô Lâm, Kăn xiâm pơkuâ hnê ngăn Đảng pơkuâ djâ khu kăn xiâm tơnêi têa troh têk nhang, pleăng reăng tơbâ kơ pôa Trường Chinh a Um meăn ƀă Hngêi ‘măn um tơmeăm tơbâ dêi pôa Trường Chinh, Kăn xiâm pơkuâ hnê ngăn Đảng hneăng hdrối.

Pôa Trường Chinh, Kăn xiâm pơkuâ hnê ngăn Đảng inâi khât cho Đặng Xuân Khu, kot mâ hâi lơ 9/2/1907, tung môi rơpŏng hngêi mơngế hriâm lâm kân ‘nâi pâ nhoăm tơnêi têa, rak túa lĕm tro kơnía ton nah, cho châ plah rêm rôh tơ’noăng a pơlê Hành Thiên, cheăm Xuân Hồng (Xuân Trường).

Lối 60 hơnăm pêi cheăng ăm kăch măng sap ing  (hơnăm 1925 troh hơnăm 1988), pôa hiăng châ pôk pro kăn pêi hên hnoăng cheăng dêi Đảng ƀă Tơnêi têa... Drêng dế pêi hnoăng cheăng, pôa Trường Chinh đi đo mơhno tơná cho mơngế kăn ƀô̆ pơkuâ hnê rơkê, djâ troăng pêi ahdrối, ‘nâi pâ vâi pú, kuăn pơlê, plâ ối rêh, tơplâ xua vâ pro tơniăn lĕm, tơniăn Tơnêi têa,  xuâ vâ pro hơniâp tơniăn ăm kuăn pơlê.

Cho hok tro ki rơkê dêi Hồ Chí Minh, Kăn xiâm hnê ngăn tơnêi têa ki apoăng, Kăn pơkuâ hnê cheăng kăch măng ki rơkê, ngế rơkê cheăng kal kí, tiô tuăn mơno lĕm, pôa Trường Chinh, Kăn xiâm pơkuâ hnê ngăn cheăng Đảng hneăng hdrối nah hiăng ‘măn ăm Đảng ƀă Tơnêi têa hên tơmeăm kơnía git tơdroăng kal kí, tung mê ai Hlá mơ-éa chêh “Đề cương ‘na Túa lĕm tro Việt Nam’’ troh nôkố mâu tơdroăng ‘na mơhno túa lĕm tro dêi pôa chêh xuân ối tiah mê ki kơnía git, cho mâu ƀai hriâm kơnía ăm Đảng pin tung tơdroăng mơjiâng ƀă kring vế Tơnêi têa Việt Nam xah hô̆i chuh ngiah.