Dak Nông kô kơdroh ki vâ iâ má môi 20% biên chê̆ châ kâ liăn khế ing hnôu liăn tơnêi têa tung pơla 5 hơnăm. Jâ Nguyễn Thị Thu Hường, Kăn pơkuâ Khu pơkuâ kăn ƀô̆ kong pơlê Dak Nông tối ăm ‘nâi, kong pơlê dế thăm pêi pro Pơkâ 18-NQ/TW tiô tro troăng. Pơtối mê, kong pơlê hiăng ai troăng hơlâ mơgêi tơdroăng 10 khu tơrŭm cheăng, kơ koan, tíu cheăng a râ kong pơlê; tơ’mot chiâng môi 10 khu cheăng chiâng 5 khu. Tơdroăng rah xo bro lế lĕm tro, rah xo kăn ƀô̆, ki má lối cho ngế ối a ko mâu tíu cheăng pro chiâng môi châ pêi pro tiô troăng tơdâng tơ’mô, ôh tá tơdjâk pa kong, tơbleăng tơdrăng ƀă ôh tá ăm ai tơdroăng ki ôh tá lĕm tro, pro pơxúa khu, ôh tá tro tung tơdroăng rah xo bro lế lĕm tro khu pêi cheăng tơnêi têa ƀă kăn ƀô̆.

Tơdrêng amê, troăng rah xo bro lế lĕm tro châ mơjiâng tiô troăng tŭm tâi tâng mâu tơdroăng cheăng hnoăng cheăng, tơkŭm po khu pêi cheăng, ƀiên chê̆, tíu pêi cheăng dêi khu tơrŭm pêi cheăng, kơ koan, tíu cheăng hdrối ƀă kơ’nâi rah xo bro lế lĕm tro.