A kố, khu tơkŭm po hiăng pơcháu 16 khu chêng koăng, 69 prôa tính ƀă mâu kế xah tôu, rơtế hrĭng ếo pơtâk tiô khôi vâi krâ nah dêi mâu hdroâng kuăn ngo Rơđế, Lếo, Tày, Nùng, Thái, Mường, Thanh Y,... ăm 33 kâu lăk ƀô̆, khu rơhdruê xuăng dêi mâu thôn, pơlê kơpong hdroâng kuăn ngo tung kong pơlê.

Tơdroăng kố pêi pro tiô pơkâ hơnăm 2024 dêi kong pơlê, ối tơdroăng xiâm Pơkâ kơxô̆ 10 dêi Hô̆i đong kuăn pơlê kong pơlê Dak Lak ‘na rak vế ƀă mơnhông khôi túa lĕm tro ‘na chêng koăng a kong pơlê hneăng hơnăm 2022 – 2025 ƀă tơdroăng xiâm tơnêi têa mơnhông cheăng kâ – rêh ối pơlê pơla kơpong kuăn pơlê hdroâng kuăn ngo ƀă kong ngo ‘na rak vế, mơnhông ki kơnâ khôi túa lĕm tro dêi mâu hdroâng kuăn ngo ƀă mơnhông ôm hyô.