Rơvĭu reăng ai chư chêh “Đi đo khíu pâ kơ Pôa Hồ Chí Minh, Kăn xiâm hnê ngăn ki rơkê”. Ƀă hiâm mơno mơnê pa kâi tối, Khu kăn hiăng nhoăm pâ kơ Pôa Hồ Chí Minh, Kăn xiâm hnê ngăn tơnêi têa ki apoăng, ngế kăn ki rơkê, Khên tơnôu pro tơleăng lĕm hdroâng mơngế. Ngế hiăng pleăng plâ rơxông ăm kuăn pơlê, ăm tơnêi têa, djâ Đảng pin, kuăn pơlê pin pêi mâu tơdroăng plâ ƀlêi trâng, pơ-eăng hdroâng mơngế, tơnêi têa pin.

Pơtối mê, Khu kăn xiâm pơkuâ hnê ngăn Đảng, Kăn xiâm hnê ngăn tơnêi têa, Kuô̆k hô̆i, Chin phuh, Vi ƀan xiâm Măt trâ̆n tơnêi têa Việt Nam hiăng ‘măn rơvĭu reăng ƀă têk nhang tơbâ mâu ngế ki hlâ khên tơnôu a tíu meăn chêh tơbâ inâi mâu lêng tơplâ hlâ rêh, khên tơnôu a troăng Bắc Sơn.