Tung rôh Hôp Khu kăn Tơrŭm cheăng Kuô̆k hô̆i mơjiâng Luât (APF) ƀă hneăng hôp tơrŭm cheăng mơjiâng Luât ‘na pêi chiâk krá tơniăn, tơniăn kế kâ ƀă hbrâ ví ƀă hyôh kong prâi hơ’lêh, a Pơlê kong kân Cần Thơ, pôa Trần Thanh Mẫn, Kăn xiâm hnê ngăn Kuô̆k hô̆i hiăng tơdah Kăn xiâm hnê ngăn Kuô̆k hô̆i Kŏng hoa Yân chuh Congo Vital Kamerhe.

A rôh tơdah, Kăn xiâm hnê ngăn Kuô̆k hô̆i tối, Việt Nam ngăn tơrŭm cheăng tiah hmâ ƀă Kŏng hòa Yân chuh Congo, péa tơnêi têa hiăng mơjiâng tơrŭm tơpui kâ ing hdrối vâ châ tơniăn lĕm (hâi lơ 13/4/1961);  khĕn kơdeăn mâu hnoăng hiăng mơnhông cheăng kâ, mơ-eăm tơniăn kal kí dêi kong têa Congo tung hơnăm hdrối, veăng mơnhông ki rơdêi dêi kong têa tung kơpong.

Tối nhên, tơrŭm cheăng Kuô̆k hô̆i cho môi troăng ki kal tung tâi tâng tơrŭm cheăng pơla péa tơnêi têa tung tâi tâng tơrŭm pơla péa pâ ƀă hên troăng, Kăn xiâm hnê ngăn Kuô̆k hô̆i púi vâ, tung la ngiâ mơdêk tơrŭm cheăng péa Kuô̆k hô̆i, tung mê ai péa pâ tơrŭm tơpui tâi tâng mâu kăn dêi Kuô̆k hô̆i péa tơnêi têa xuân môi tiah kơ koan cheăng mâu kơvâ xiâm dêi péa Kuô̆k hô̆i.