Xo tơmeăm Têt 500 rơpâu liăn ing Tơdroăng “Hơngui hơ-ui pâ” xua Khu lo tong veăng kong pơlê Dak Lak tơrŭm ƀă mâu tíu pêi cheăng tơkŭm po, jâ H’Wênh Ƀyă, ối a ƀuôn Kroa B, cheăm Čuôr Dăng, tơring Čư̆ Mgar phiu ro tối.

“Akố xúa liăn ki kố vâ rôe phái, á ro ‘nâng, xua rêm hâi a lăm tôm xo mâu kong kếo chhá ôh tá châ liăn. Nôkố châ mâu kăn ăm tơmeăm á mơnê ‘nâng, châ vâi gum ăm, mơhé hên lơ iâ a xuân tâ hơniâp ro”.

Vâ teăm gum, mơhnhôk mâu kơtiê, rơpŏng hngêi ki xơpá kô châ tơdah hơngui tŭm tâ, Khu lo tong veăng kong pơlê Dak Lak hiăng tơrŭm ƀă mâu tíu pêi cheăng tŏng gum ăm hrĭng kơxu tơmeăm a mâu pơlê kơpong xơpá, kơpong hdroâng kuăn ngo. Tơdrêng ƀă tŏng gum Têt, Khu lo tŏng veăng tơrŭm tơbleăng pêi mâu tơdroăng tung rêh ối pơlê pơla: hnê rak vế ivá kơhnâ, xêa hơnĕng ăm hnĕng lĕm, ăm ƀaoh hiêm khăm pơlât, diâp hnoăng liăn hriâm ƀă hlối hbru rơxế mái ăm mâu hok tro ki kơtiê mơ-eăm hriâm rơkê...

Pakĭng mê, mâu khu Đoân droh rơtăm, khu ngăn vâi kơdrâi, Liên đoân ngăn mơngế pêi cheăng... xuân tơkŭm po hên tơdroăng pêi pro tŏng kum Têt ăm kuăn pơlê a kơpong xơpá, tíu tơkăng kong. Jâ Võ Thị Ngọc, Kăn phŏ hnê ngăn Khu vâi kơdrâi kong pơlê Dak Lak tối:

          "Ƀă Khu ngăn vâi kơdrâi kong pơlê xuân hiăng tơkŭm po diâp pri ăm mâu ki xơpá ƀă kơnâ 500 rơtuh liăn, tơkŭm po tơdroăng gum tơmeăm Têt hơ-ui pâ a tơring Krông Ƀuk; Rơtế ƀă vâi kơdrâi tíu tơkăng kong, tơkŭm po mâu tơdroăng cheăng pêi troh vâi kơdrâi ƀă vâi hdrêng kơtiê a tíu tơkăng kong a kơtâo Lốp ƀă Ea Ƀung. Tung la ngiâ kô pơtối tơkŭm pêi mâu tơdroăng cheăng a mâu tíu pêi cheăng ƀă mâu pơlê ki xơpá”.

Troh nôkố, a kong pơlê Dak Lak hiăng ai lối 55.00 rơpŏng châ ăm tơmeăm Têt ƀă tâi tâng kơxô̆ liăn lối 25 rơtal liăn. Tiô jâ Nông Thị Thu, Phŏ hnê ngăn Vi ƀan Măt trân tơnêi têa Việt Nam kong pơlê Dak Lak, kong pơlê rak tơniăn tâi tâng mâu rơpŏng kơtiê, rơpŏng vâ chê kơtiê xuân châ hbru tơmeăm, ai tơmeăm châ xah hêi ro rơnó Hơngui, Tơdah Têt tro tiô pơkâ ôh tá “Lôi ngế ki lâi pá rŏng”.

          “Xoăng 1.550 kơxu tơmeăm kơnâ rêm kơxu 500 rơpâu liăn xo ing Liăn ‘măn kơdĭng xua mâu kơtiê dêi kong pơlê. Pakĭng mê, tơrŭm krá ƀă mâu khu tơrŭm cheăng tung khu Măt trâ̆n pêi pro mâu tơdroăng tơmâng tŏng gum Têt ăm mâu ngế kơtiê tiô tơná hriâm xuân môi tiah tơrŭm ƀă Măt trâ̆n ƀă mâu tíu pêi cheăng, kong pơlê tơkŭm pêi mâu tơdroăng cheăng rôh Tê Lo hơnăm nếo Ất Tỵ 2025”.

Mâu hâi ki kố, Tơdroăng “Têt tơkŭm dêi rơpó – Rơnó Hơngui mơnê Đảng“ ƀă “Kơchơ Têt kŏng đoân hơnăm 2025” a kong pơlê Dak Lak xuân nếo tơkŭm po ƀă hên tơdroăng cheăng pêi ai pơxúa pro tơtô hiâm mơno mơngế pêi cheăng. Khu tơkŭm po hiăng diâp 400 kơxu tơmeăm ăm mâu đoân viên, mơngế pêi cheăng, kơnâ 800 rơpâu liăn/hnoăng; kum liăn pro 11 toăng hngêi tơtô kŏng đoân “tâi tâng kơxô̆ liăn 550 rơtuh liăn. Châ xo hngêi tơtô kong đoân rôh kố, nâ H’Ƀen Mlô, cô hnê hngêi trung mâuh yăo Ea HĐing, tơring Čư̆ Mgar tối:

“Hâi kố a tâ ro châ mâu kơ koan tíu hpêi cheăng veăng gum a châ pro hngêi tơtô Kong đoân hơnăm 2025. A tơmiât a poăng khế 3 á kô pro hngêi/Ki khât á  tâ hơniâp ro ƀă tơtô tung hiâm mơno”.

Tơdroăng “Kơchơ Têt kong đoân hơnăm 2025” a Dak Lak po a 50 tíu pêi cheăng, khu mơdró. Ƀă tâi tâng kơxô̆ liăn rôe tơmeăm vâ chê 1 rơtal, a kố pêi hên tơdroăng ai pơxúa môi tiah ăm phĭu liăn rôe tơmeăm tê kơtê, khăm ngăn ivá, hnê ‘na luât ƀă mâu tơdroăng xah hêi ăm mâu đoân viên, mơngế pêi cheăng. Nếo klêi chêh inâi tơmeăm rôe châ tơmeăm ki tro tơná vâ rôh Têt, nâ Tống Thị Thu Thoi, kŏng ti in Dak Lak ăm ‘nâi: 

“Tâi tâng mâu vâi nâ o lăm kơchơ Têt kong đoân 2025 troh a kố hlo hên tơmeăm ki kố ki mê. Troh a kố hên tơmeăm kơjo liăn, kong đoân hiăng chêh iâ tung phíu rôe tơmeăm, pơhlêh tơmeăm. Tối tơdjuôm hên tơdroăng tŏng kum, hên tơmeăm ăm kŏng nhân mơngế pêi cheăng rôe’’.

Tiô ăm ‘nâi, rôh Têt Lo hơnăm nếo Ất Tỵ hơnăm kố, kong pơlê Dak Lak ‘no lối 75 rơtal liăn vâ rôe  tơmeăm ăm mâu ai hnoăng, mâu kơtiê ƀă mơngế pêi cheăng. Tơdrêng amê, 138 kơ koan, đông lêng, kong an, mâu cheăng rak ngăn kong kô châ xo tơmeăm kơnâ sap 3-7 rơtuh liăn. Kăn pơkuâ kong pơlê xuân lăm pôu hlối diâp 54 kơxu tơmeăm ăm mâu ai hnoăng tơnêi têa kơhnâ cheăng ƀă mâu kơ koan, tíu pêi cheăng đông lêng tung kong pơlê.