Po a Tíu ‘măn rak mơ-éa kong pơlê Dak Lak ing nôkố troh tâi hâi lơ 2/2 la ngiâ, Mơdĭng Hlá tơbeăng rơnó Hơngui Ất Tỵ kong pơlê Dak Lak mơđah tơbleăng vâ chê 250 kơxop mơ-éa hlá tơbeăng tŭm túa, lối 1 rơpâu kơxop hlá tơbeăng ƀă lối hrĭng kơxô̆ hlá tơbeăng rơnó Hơngui. Rơtế ƀă mơđah tơbleăng tơdrêng, mâu hlá tơbeăng kố ối châ pro pơhlêh tơ’lêi hlâu ăm tơdroăng ki pơchuât ing troăng hyôh internet, mâu hlá tơbeăng kô châ diâp troh mâu Hngêi mơhno túa lĕm tro pơlê pơla a mâu pơlê cheăm kơpong hngế hngo dêi kong pơlê.

Pôa Nguyễn Văn Phú, Kăn hnê ngăn Khu chêh hlá tơbeăng kong pơlê Dak Lak ăm ‘nâi: hơnăm kố, mâu hlá tơbeăng hơngui tối ‘na tơdroăng rêh ối cheăng kal kí, cheăng kâ, pơlê pơla, ivá hâk tơngăm, khên tơnôu dêi kuăn mơngế Việt Nam, tơdroăng ki ƀlêi chiâng tung pêi cheăng, tơmiât troh la ngiâ tơniăn lĕm dêi tơnêi têa, hdró ki lĕm hiâm mơno “Chal ki mơ-eăm tơná dêi hdroâng mơngế”.