Pơlê Khá ối achê troăng kân Tơnêi têa 6, kơtăn pơlê kân Yên Châu, tơring Yên Châu vâ chê 10km vêh peăng Hà Nội. Pơlê ai lối 90 rơpŏng, lối 420 pơ’leăng mâ mơngế, cho 100% mơngế hdroâng kuăn ngo Thái rêh ối. Troh ƀă pơlê Khá, tơmối kô châ rêh ối tíu sôk ro, hơniêp lĕm, tơmeăm ai xêh dêi pơlê Thái ton nah, ƀă tâi tâng mâu rơpŏng pơrá rêh ối tung hngêi trá ton nah, rơtâ tá cho kơdrum loăng plâi nong, plâi mak kham ton hơnăm rơngiâp lĕm, ai têa plông Vạt rơtâ tá...

-Kuăn pơlê pơlê Khá tơkŭm po leh hô̆i ‘’Đông Sửa’’ a kơpong kong dêi pơlê

Pôa Quàng Văn Phanh, 80 hơnăm, kuăn pơlê Khá tối ăm ‘nâi, kuăn pơlê tung pơlê nôkố dế rak ƀă mơnhông hên khôi túa lĕm ki má môi dêi hdroâng kuăn ngo Thái, môi tiah rơhdruê, rơngêi, mơđah tơbleăng xah prôa, têng nêng hdroâng kuăn ngo; rak mâu tơdroăng cheăng ki pêi ƀă kŏng tiô khôi vâi krâ nah môi tiah vê prế, teăn kên piêu, teăn pong, chêa, mâu tơmeăm ki xúa rêm hâi, rơtế mâu leh mơdĭng tiô khôi vâi krâ nah ki rơkâu xối pâ ai ivá, pói vâ môi hơnăm nếo mêi tro tô ‘ló, pêi lo châ hên tơmeăm khoăng.

‘’Rêm hơnăm troh hâi lơ 10 cho thế xếi pleăng 1 xôh. Xối pleăng ăm kuăn pơlê mo sêi, pêi kâ châ tơƀrê; klâng chiâk pêi lo châ hên tơmeăm; kơpôu ro mo dâi, ôh tá tro tâ pơreăng’’

Ing mâu tơmeăm ki ai hlâu, tơmeăm ki hiăng ai, tơring Yên Châu hiăng pêi pro tơdroăng tơkêa bro mơnhông troăng pêi ôm hyô thôn pơlê a pơlê Khá; troăng prôk mơjiâng tơmeăm ôm hyô tung 5 hơnăm, ƀă tâi tâng kơlo mơ’no liăn cheăng dâng 43 rơtal liăn, tơkŭm mơjiâng mâu tơmeăm ki xiâm, môi tiah: Bo cheăm mot a pơlê; mơjiâng tíu tơdah tơmối a tíu ‘măn rơxế; tíu ‘măn rơxế ƀă mâu rơxế kơtâu ƀă on tơhrik pơto tơmối mot tung pơlê thế tơniăn krúa lĕm kong prâi; mâu tíu tê tơmeăm ƀă tơdroăng xah hêi châ tâ châ hlo; mơjiâng troăng pêi mơnúa; bro rơnêu kong kế pơlê lĕm mơnâ, mơjiâng mâu tíu mơdrah kân, kŭn...

‘Na peăng pơlê Khá, po rơdâ pêi pro Tơdroăng tơkêa bro hiăng rah xo 5 rơpŏng ai ivá rơnêu bro chiâng homestay; 3 rơpŏng ai ivá po hngêi tê tơmeăm kâ hdroâng kuăn ngo; 3 rơpŏng ai ivá vê prế, teăn kên piêu, teăn pong chêa tơmeăm xúa rêm hâi gum tơdah tơmối ôm hyô; hên rơpŏng kuăn pơlê a pơlê Khá hiăng châ pơtâp tơdroăng ki rơkê pêi ôm hyô pơlê pơla. Pơlê xuân mơjiâng 2 khu rơhdruê xuăng tiô khôi vâi krâ nah, đi đo tơkŭm po pơtâp ƀă mơđah tơbleăng mâu tơdroăng rơhdruê, rơngêi, ting ting, kơhnhon xuăng, xah rêi nhak vâ tơdah tơmối ôm hyô. Nâ Vì Thị Thanh, kuăn pơlê pơlê Khá tối:

‘’Rơpŏng á ai kĭ veăng pêi ôm hyô. Klêi kơ’nâi kĭ, rơpŏng hiăng rôe pơkhom kơmung nếo vâ hbrâ tơdah tơmối. Drêng tơmối troh, ngin hmâ pế mâu kơchâi kâ dêi mơngế Thái, môi tiah kơchâi plâi hung, kơchai bon, tơpăng âp, í, ká pôh...vâ ăm tơmối kâ’’.

Pôa Quàng Văn Chiến, Kăn phŏ hnê ngăn Vi ƀan cheăm Sặp Vạt xuân tối ăm ‘nâi:

‘’Kong pơlê, tơring tơmâng ai troăng hơlâ mơjiâng pơlê Khá cho tíu ôm hyô pơlê pơla, cheăm ngin phiu ro ‘nâng. Ngin hiăng rơtế tơring ƀă tíu cheăng hnê mơhno tơdroăng séa ngăn, vêh pơkâ pêi pro mâu tơmeăm troăng pơlê, kơtâu, mơjiâng Khu tơrŭm cheăng ôm hyô vâ kuăn pơlê rơtế kuăn pơlê rơtế pêi ƀă chiâng ‘nâi pêi ôm hyô môi tiah’’.

Tiô pôa Lù Văn Cường, Kăn hnê ngăn Vi ƀan tơring Yên Châu, vâ mơjiâng pơlê Khá chiâng pơlê ôm hyô pơlê pơla ƀă mơjiâng thôn pơlê nếo, Vi ƀan tơring Yên Châu hiăng hnê mơhno kơvâ cheăng mơjiâng ƀă hnê mơhno túa pêi ‘na kong prâi khôi túa lĕm tro a tíu ôm hyô pơlê pơla pơlê Khá; tơkŭm po mâu lâm hnê mơhno, hnê mơjiâng mơngế pêi cheăng, mơdêk hlê plĕng ‘na kong prâi khôi túa lĕm, mơjiâng mâu pơkâ ‘na troăng rêh ối, troăng pêi tung tơpui tơno, tung troăng tơpui tơno xuân môi tiah tung mâu tơdroăng tê mơdró ôm hyô ki ê.

Pakĭng pơlê ôm hyô pơlê pơla hdroâng kuăn ngo Thái, kong pơlê xuân mơjiâng pơkâ pêi rak vế, mơnhông ki kơnâ khôi túa lĕm mâu hdroâng kuăn ngo môi tiah Mông, Xinh Mun..., vâ mơnhông ki kơnâ khôi túa lĕm tro ƀă ôm hyô; ing mê, mơjiâng troăng mơnhông mơdêk cheăng kâ - rêh ối pơlê pơla tung pơlê mơnhông mơdêk. Kố xuân cho môi tung mâu tơdroăng xiâm ki kal ki tơring djâ tung tơdroăng tơkêa bro Pơkâ Hneăng hôp Đảng ƀô̆ tơring roh má XX, hneăng hơnăm 2026 – 2030 kô tơkŭm po a hơnăm la ngia.