Kong pơlê Dak Lak nôkố ai dâng 10 rơpâu ngế dế rêh ối, hriâm tâp, pêi cheăng a 29 to kong têa ƀă tung kơpong. Tung mê  5 hơnăm  hdrối, kuăn pơlê pin ki rêh ối a kong têa ê ƀă nhŏng o xiâm vâi hiăng veăng tơlo lối 140 rơtuh dollars vâ mơjiâng ƀă mơnhông dêi pơlê xiâm, kơhnâ veăng pêi tơdroăng pơlê pơla tơniăn tung rêh ối, mơnê mâu ai hnoăng tơnêi têa a mâu kong pơlê, veăng ‘no hnoăng mơnhông cheăng kâ rêh ối kong pơlê.

Pôa Nguyễn Tuấn Hà, Phŏ kăn hnê ngăn Vi ƀan kuăn pơlê kong pơlê Dak Lak tối, kong pơlê vâ tơmâng mâu tơdroăng hnê tối, hnoăng veăng ‘no dêi kuăn pơlê, khu mơdró ƀă mơngế pin ki rêh ối a kong têa ê; pro hlâu ăm kuăn pơlê pin ki rêh pói a kong têa ê ƀă nhŏng o vâ ai pơtối veăng ‘no hnoăng mơnhông pơlê rế mơnhông. A tơdroăng mê, tơdroăng xah hêi tơtô, hmâ achê, mơngế pin ki rêh ối a kong têa ê ƀă nhŏng o tối sôk ro mơhno ki kơdrâm hlo pơ’lêh dêi pơlê, tơnêi têa.