Kuăn pơlê Việt Nam a Ba Lan nôkố ai dâng 30 rơpâu ngế, veăng gum hên khât tung tơdroăng rak vế, mơnhông tơrŭm khôi hmâ, tơrŭm tơroâ, tơrŭm tung hên kơvâ cheăng pơla péa tơnêi têa. Rôh hơnăm nếo, teăng mâ kăn pơkuâ hnê ngăn Đảng, Tơnêi têa, Ngế pro xiâm hnê ngăn tơnêi têa pơtroh rơkong rơkâu lĕm má môi ăm mâu kuăn pơlê Việt Nam a Ba Lan.

Ngế pro xiâm hnê ngăn tơnêi têa ăm ‘nâi tung rôh lăm pôu kố, kô veăng ai mâ a rôh po tơdroăng Hơngui pơlê xiâm rơkâu Têt ăm kuăn pơlê ki rêh ối cheăng kâ a Ba Lan. Ngế pro xiâm hnê ngăn tơnêi têa hiăng mơdoh hên chôu tiâ mơnhên mâu tơdroăng ki tơpui tối, pâ thế dêi vâi krâ nhŏng o; hnê mơhno Khu xiâm ngăn tơpui kâ, mâu kơ koan ki ai tơdjâk troh séa ngăn mâu pơkâ ki tơdjâk troh tơnêi têa; mơdêk tơdroăng hnê nâl Xuăn tung mâu hngêi trung hriâm a Ba Lan.

Ngế pro xiâm hnê ngăn tơnêi têa ăm ‘nâi tung rôh lăm pôu kố, hiăng tơpui tơno ƀă kăn xiâm pơkuâ kong têa ƀă Ngế pro xiâm hnê ngăn kong têa Ba Lan ‘na tơdroăng ki pơkâ mơdêk mơnhên kuăn pơlê Việt Nam cho hdroâng kuăn ngo, pơkâ thế vâi krâ nhŏng o rêh ối a kong têa ê ƀă kăn teăng mâ kơhnâ veăng mơdêk tơdroăng kố.