Nâ Nguyễn Thị Hoàng Mai, Ngế pơkuâ môi Kŏng ti veăng tơlo liăn cheăng a pơlê kong kơdrâm Buôn Ma Thuột, kong pơlê Dak Lak, ăm ‘nâi, Tết hơnăm kố nâ ôh tá tơmiât hên ki klâi tung tơdroăng rah rôe mâu tơmeăm vâ mơnê kơ khu ki tơrŭm cheăng. Tơmeăm pê lo ing chiâk deăng dêi kong pơlê Dak Lak hên  la ki tơƀrê hiăng mơhno, tơtro vâ kŏng ti nâ rôe pro tơmeăm ăm dêi pú:

“Môi tiah rêm hơnăm mê a rah tơdrong tâ tơmeăm lĕm mơnâ mâ cho mâu kơƀăn kĕo tơmeăm rôe ing kong ê, la hơnăm kố a pơkâ rah rôe mâu tơmeăm kơnía git ai trếo kơhiâm pơxúa lĕm ăm châ chăn ƀă cho tơmeăm ki kong pơlê pêi lo mê cho kloăng plâi hôt, kloăng mắc-ca, kloăng Sa Chi, drôu đông trùng hạ thảo pơtroh ăm tơmối ki git. Ki hdrối cho ki lĕm krúa ai trếo kơhiâm, ki má péa cho ki lĕm krê dêi kong pơlê tơná’’.

Ƀă nâ Lê Thị Thanh Thúy, ối a bêng Tân Lập, pơlê kong kơdrâm Buôn Ma Thuột, xuân  rah rôe mâu tơmeăm kơchâi plâi kâ ối drêh a Dak Lak lơ mâu kloăng plâi ki têng khăng:

“Hên hơnăm kố a hiăng rôe mâu tơmeăm pê lo ing chiâk deăng krúa, lĕm ăm ivá,  tơtro ƀă tơdroăng vâ kâ ôu tung hâi Tết. Á xuân loi kơ mâu tíu pêi cheăng, khu pêi cheăng tơrŭm, khu mơdró pêi mâu tơmeăm khoăng ki vâi ô eăng tung kong pơlê. Mê nôkố hên tơmeăm dêi kong pơlê ai tiô kong pơlê pơkâ. Mê nôkố hên tơmeăm dêi kong pơlê pêi krúa lĕm  tro tiô ối châ tê ăm kong têa ê nếo”.

Tiô jâ Trần Ngọc Đan Thùy, Ngế pơkuâ kong ty Green Foods, pơlê kong kơdrâm Buôn Ma Thuột, kơchơ mơdró tơmeăm pê lo ing chiâk deăng dêi kong pơlê Dak Lak hên túa tơmeăm, yă tơtro há. Tơdroăng tê rôe tơniăn, ‘nâi nhên xiâm mơjiâng pro, pro ăm kuăn pơlê loi khên rôe  mâu tơmeăm:

“Tơdroăng ôh tá ai tŭm tơmeăm tê. Mâu rôh Têt môi tiah kố mơngế vâ rôe hên. Hên drêng ‘nâ,  pin chêh inâi rôe tơmeăm péa pái hâi hiăng troh, ôh tá xê troh tơdrêng. Mê drêng rôe mâu tơmeăm dêi kong pơlê pê lo cho hmiân tuăn tơmeăm nếo mơjiâng pro há, pro troh dâng lâi kơ-óu, tâ tung kơxu dâng mê, tơmeăm ki pin rôe kâ rơ-ĕng hơ-iâ, lĕm krúa há”.

Tung rôh Têt, tơmeăm pê lo ing chiâk deăng dêi kong pơlê ôh tá xê bú xú kơhiâm lĕm tiô hmâ pêi ing nah mê ối mơho tối ki lĕm ivá, pêi cheăng  kâ mơhúa ƀă kro mơdrŏng. Tơdroăng mơngế a Dak Lak rôe xúa tơmeăm kế kâ ki kong pơlê pê lo tơmeăm Têt xuân môi tiah tơmeăm xúa tung rơpŏng hngêi cho tơdroăng pêi pro pơ-eăng lâp lu túa lĕm tro, hlối môi tuăn mơnhông krá tơniăn dêi kơvâ pêi chiâk deăng.