Pôa Hun Sen, kăn xiâm hnê ngăn tối rơdêi, Kul ôh tá la lâi piu tơdroăng tŏng gum tá hiâm mơno, tá tơdroăng ki nhuô̆m pâ dêi Việt Nam tung pơla hdrối kố nah xuân môi tiah nôkố. Hlo tơdroăng ki pơloăng mơnúa tơdjuôm dêi kơpong ƀă tung lâp plâi tơnêi nôkố, péa tơnêi têa rế tơrŭm krá tâ nếo, tơrŭm tơniăn tâ tung tâi tâng mâu kơvâ cheăng kal kí, cheăng kâ, tê mơdró, tơdroăng cheăng lêng, gâk kring.

Pôa Trần Thanh Mẫn, Kăn xiâm hnê ngăn Kuô̆k hô̆i tối rơdêi, Đảng, Tơnêi têa Việt Nam đi đo ngăn nhuô̆m ƀă kơjo kum ăm tơdroăng ‘mâi mơnhông ƀă thăm mơdêk tơrŭm cheăng tơnêi têa ki a chê tơniăn lĕm, tơrŭm tơroâ khôi hmâ, tơrŭm tung tâi tâng tơdroăng, krá tơniăn ton xŏn pơla Việt Nam – Kul, xua ki pơxúa dêi kuăn pơlê péa tơnêi têa, xua tơdroăng ki tơniăn, tơrŭm ƀă mơnhông a kơpong ƀă a kong têa ê. Kăn xiâm hnê ngăn Kuô̆k hô̆i pơkâ thế péa pâ pơtối pơhlêh nếo ƀă hên mâu túa ki hnê tối vâ kuăn pơlê, malối cho ƀă mâu rơxông hơnăm ối nếo dêi péa tơnêi têa hlê plĕng tro ‘na tơrŭm cheăng khôi hmâ tơrŭm tơroâ, tơrŭm tŭm têk pơla mâu kơvâ cheăng Việt Nam – Kul.