A Hneăng hôp khu râ kăn xiâm G20, Khu râ kăn teăng mâ kăn xiâm Việt nam hiăng veăng tâi tâng mâu tơdroăng ki xiâm dêi Hneăng hôp. Ngế pro xiâm hnê ngăn Chin phuh hiăng ai ƀai xông tơpui ki kal a mâu roh tơpui tơno ‘na ‘’roh pêi pro tơdroăng hbrâ mơdât kơklêa kơtiê’’  ƀă ‘’mơnhông krá tơniăn ƀă pơhlêh on tơhrik’’ rơtế 35 roh trâm mâ pơla péa pâ ƀă hên khu râ kăn pơkuâ mâu kong têa, mâu khu tơrŭm cheăng lâp plâi tơnêi veăng Hneăng hôp. Mâu tơdroăng pêi hên, châ tơƀrê dêi Ngế pro xiâm hnê ngăn Chin phuh hiăng kơchuâ nhên um méa Việt Nam ƀeăn ƀĕng, lĕm tro, ‘’cho pú hmâ, cho khu tơrŭm ki loi tơngah ƀă cho khu tơrŭm ai hnoăng tung mâu kong têa lâp plâi tơnêi’’.

Tung roh lăm pôu pêi cheăng păng ‘nâng kong têa Kŏng hoa Dominica, pôa Phạm Minh Chính, Ngế pro xiâm hnê ngăn Chin phuh hiăng ai roh tơpui tơno ki kal, châ tơƀrê hên ƀă Kăn xiâm pơkuâ kong têa Luis Abinader Corona, ing mê péa pâ hiăng ăm Tơbleăng tơdjuôm mơnhên tơdroăng ki khŏm mơ-eăm dêi péa Chin phuh ƀă tơbleăng mâu troăng pêi la ngiâ, troăng pêi châ péa pâ môi tuăn vâ mơdêk tâ mê nếo tơrŭm cheăng môi tuăn, nhŏng o ƀă tơrŭm lĕm tro pơla Việt nam ƀă Kŏng hoa Dominica tung la ngiâ.