Kơxo hâi lơ 21/11,  tiô rơkong krếo thế dêi Ngế pro xiâm hnê ngăn kong têa Malaysia, pôa Tô Lâm - Kăn xiâm pơkuâ hnê ngăn Đảng ƀă kơdrâi pôa rơtế ƀă mâu kăn xiâm tơnêi têa pin hiăng troh a pơlê kong xiâm kuala Lumpua, pơxiâm lăm pôu khât kong têa Malaysia. Klêi leh tơdah châ tơkŭm po kân krip tíu pêi cheăng dêi Ngế pro xiâm hnê ngăn kong têa Malaysia a Pơlê kong xiâm Kuala Lumpur, pôa Tô Lâm - Kăn xiâm pơkuâ hnê ngăn Đảng  hiăng hôp tơpui tơno ƀă Ngế pro xiâm hnê ngăn kong têa Malaysia.

A rôh hôp, péa ngế kăn tơbleăng ăm dêi rơpó ‘na mâu tơdroăng tơrêm kong têa, tơpui trâu tâ ƀă mâu troăng hơlâ mơdêk tâ nếo tơrŭm cheăng pơla péa tơnêi têa tung tâi tâng mâu kơvâ cheăng rế mơnhông rơdêi, tŭm tơdroăng ƀă ai pơxúa tâ tung la ngiâ.

Việt Nam púi vâ rơtế ƀă Malaysia mơnhông tơrŭm cheăng loi nhoăm dêi pó ƀă tơrŭm tơƀrê pơla péa tơnêi têa troh mâu hơnăm nếo ƀă a kơlo ki a ‘ngêi, ai pơxúa tâ nếo, ai tiô pơkâ mơnhông dêi tơnêi têa tung mâu hơnăm nếo, kơhnâ pêi hnoăng cheăng rơtế ƀă Malaysia ƀă mâu kong têa ASEAN mơjiâng khu kong têa ASEAN tơrŭm môi tuăn, krá rơdêi.